VIQUEQUE, 02 outubru 2023 (TATOLI)—Abitante na’in-50 hosi suku Uaimori, postu administrativu Viqueque Vila, munisípiu Viqueque seidauk iha kartaun eleitorál.
“Ha’u preokupa ho ami-nia eleitór foun ho idade 17 ba leten seidauk bele trata kartaun eleitorál tanba sira seidauk iha dokumentu Bilhete de Identidade (BI) no sertidaun moris. Tanba ne’e, ami-nia eleitór foun seidauk bele trata sira-nia kartaun eleitorál,” Xefe suku Uaimori, Francelino A. Gomes, informa hafoin partisipa iha atividade edukasaun sívika, iha sede suku Uaimori, segunda ne’e.
Ho nune’e, Autoridade suku rekomenda ba parte Rejistu Sivíl Viqueque no Sekretriadu Tékniku Administrasaun Eleitorál (STAE) hodi fasilita abitante foun sira trata kartaun eleitorál hodi bele partisipa iha eleisaun suku loron 28 outubru.
Notísia relevante : Autoridade komunitária Nahareka preokupa abitante 500 seidauk iha kartaun eleitorál
Tuir dadus, eleitór iha suku Uaimori ne’ebé antes ne’e partisipa eleisaun parlamentár 2023 hamutuk 1.207.
Iha fatin hanesan, Komisáriu Komisaun Nasionál Eleisaun (CNE, sigla portugés) destakadu Viqueque no Lautém, Olávio da Costa Monteiro, hateten, presiza atualiza dadus eleitór iha fatin hotu nune’e eleisaun suku bele la’o ho di’ak.
“Eleisaun ida presiza dadus eleitór hodi sai sasukat. Bainhira laiha baze dadus, eleisaun sei la’o ladún di’ak, tanba baze ida maka kandidatu ida tenke hetan apoiante 1% hosi eleitór sira iha Uaimori, ita labele bazeia ba eleisaun prezidensiál no parlamentár foin lalais, maibé presiza atualiza dadus eleitór,” nia akresenta.
Nune’e, nia kompromete atu apoia instituisaun sira hodi fasilita trata abitante sira-nia dokumentu.
“Ami prontu atu fó apoia transporte ba Rejistu Sivíl hodi destaka mai suku hodi trata abitante sira-nia dokumentu. Karik instiuisaun sira presiza ami-nia tulun, ami prontu, importante haruka karta pedidu ba ami,” Komisáriu CNE informa.
Jornalista : Vitorino Lopes da Costa
Editora : Julia Chatarina
