iklan

MUNISÍPIU, VIKEKE

Abitante suku Uaimori 1.200 resin konsumu bee mota

Abitante suku Uaimori 1.200 resin konsumu bee mota

Abitante suku Uaimori partisipa atividade edukasaun sívika, iha sede suku, segunda (02/10/2023). Imajen Tatoli/Vitorino Lopes da Costa

VIQUEQUE, 02 outubru 2023 (TATOLI)—Abitante hamutuk 1.200 resin hosi suku Uaimori, postu administrativu Viqueque Vila, munisípiu Viqueque durante ne’e konsume bee mota.

“Ami aldeia haat iha suku Uaimori konsumu bee hosi mota hodi tein, hemu no haris tanba bee mai suku laiha. Nune’e, abitante sira tenke halai ba mota maka kuru bee hodi konsumu, maski ita hatene impaktu ba saúde ladún di’ak, maibé pasiénsia tenke konsumu,” Abitante suku Uaimori, Filomeno Vicente Soares, hateten iha sede suku Uaimori, segunda ne’e.

Nia haktuir, Cruz Vermelha de Timor-Leste (CVTL) iha tinan 2015 halo kanalizasaun bee-moos, maibé daudaun infraestrutura a’at hotu.

Iha fatin ketak, Médiku hosi Postu Saúde Uaimori, Marcelino da Silva, hateten, abitante sira hetan impaktu ladi’ak ba saúde tanba konsumu bee mota ne’ebé uza mós ba haris.

“Durante ne’e abitante sira asesu bee-mota hodi hemu no haris, tanba ne’e bee moos laiha. Abitante sira hetan moras ISPA no isin katar. Ho ida-ne’e, parte relevante sira presiza tau konsiderasaun hodi kanaliza bee-moos ba abitante sira iha suku ida-ne’e,” nia akresenta.

Notísia relevante : Instalasaun fasilidade bee-moos iha suku rua Viqueque ho kondisaun a’at

Autoridade suku hato’o ona preokupasaun falta bee-moos ba Programa Nasionál Dezenvolvimentu Suku (PNDS) atu dada bee-moos no distribui ona kotasaun, maibé seidauk públika sai. Bainhira publika sai maka hahú dada ona bee-moos ba abitante sira.

Suku Uaimori kompostu hosi aldeia neen hanesan Lulei, Me-Uai, Uaibubo, Uatulesu, Uma-Bo O, Uma-Liurai.

Jornalista     : Vitorino Lopes da Costa

Editora          : Julia Chatarina

iklan
iklan

Leave a Reply

iklan
error: Content is protected !!