DILI, 02 outubru 2023 (TATOLI) – Eskola Sekundária Jerál (ESG, sigla portugés) 05 de Maio Becora, 04 de Setembro Balide, Finantil no 12 de Novembro prepara ona kondisaun ba alunu sira iha ezame nasionál ne’ebé maka sei realiza iha loron 16 outubru 2023.
Diretór ESG 05 de Maio, Nicolau Adelino Ornai, hatete estabelesimentu eskolár ne’e daudaun hein de’it distribuisaun pontu ezame nasionál husi Ministériu Edukasaun.
“Ita iha kadeira no meza sufisiente atu realiza ezame nasionál ba ita-nian estudante hamutuk 610. Sala aula mós preparadu hotu ona”, dehan Ornai ba Tatoli iha Becora, ohin.
Ba tinan ida ne’e, eskola prepara ona sala aula hamutuk 16 – haat Eskola Bázika Sentrál Sérgio Vieira de Melo mak uza no 12 ESG 05 de Maio mak utiliza.
Iha sorin seluk, Diretór ESG Finantil, Hermenegildo Mascarinhas, haktuir katak sira iha estudante hamutuk 621 ne’ebé nia lista submete hotu ona ba diresaun servisu edukasaun Dili atu tuir ezame nasionál.
Aleinde ne’e, parte eskola mós garante ona prosesu ezame ne’e sei la’o ho di’ak tanba buat hotu preparadu.
Kona-ba meza no kadeira inklui sala aula ba estudante sira atu realiza ezame prontu ona no sei lahasoru problema hanesan tinan sira liubá alunu sira balun hamriik de’it.
“Kadeira ne’ebé aat ami hadi’a hotu ona hodi prienxe iha sala hamutuk 16, nune’e estudante sira bele uza hodi tuir ezame nasionál”, dehan.
Diretór ESG 04 de Setembro Balide, Martinho Menezes, mós aprezenta deklarasaun hanesan katak realizasaun ezame refere sei laiha problema tanba eskola kria ona kondisaun sufisiente.
Xefe Gabinete Apoiu Tékniku Eskola 12 Novembru Becora, Kanisius Elo, realsa sira iha estudante hamutuk 596 ne’ebé fahe ba departamentu rua mak Siénsia Teknolojia iha alunu 267 no Siénsia Sosiál 329 mak sei realiza ezame.
Eskola disponibiliza sala 26 no prepara meza no kadeira sufisiente ba alunu sira hodi bele hala’o ezame ho di’ak.
Notísia relevante: Alunu rihun 56-resin realiza ezame nasionál iha outubru
Jornalista: Tomé Amado
Editora: Maria Auxiliadora
