Gama: “Ami moris ho faan ikan, Governu labele halimar duni de’it”

DILI, 02 outubru 2023 (TATOLI)–“Ikan, ikan… Ikan butuk ida lima dolar. Folin baratu, baratu…” Bainhira liuhosi Pantai Kelapa, hahú hosi Embaixada Malázia nia oin to’o iha Jardin Largo de Lecidere, lian hakilar ne’e familiár iha ema-nia tilun liuhosi negosiante ikan sira-ne’ebé ho ulun moruk hamriik no faan nafatin ikan iha dalan públiku sira.

Notísia Relevante: “Governu sobu baraka, ami sei labele sosa foos musan ida”

Maske Governu bandu, maibé hosi Avenida de Portugál liuhosi Embaixada Amérika la’o to’o mai iha Ministériu Negósiu Estranjeiru no Kooperasaun (MNEK) nian oin, da’et to’o iha Jardin Largo de Lecidere no to’o iha Bidau Santana ne’e, negosiante ikan sira ulun to’os sei faan nafatin faan ikan iha trotoar leten no espasu públiku.

Negosiante hirak ne’e, ho fiar aan, sira hamriik tutuir malu iha dalan públiku hodi faan ikan, maibe sira-nia matan-ikun hafuhu hela ba ekipa konjunta hosi Autoridade Munisípiu Dili no Sekretária Estadu Toponímia no Organizasaun Urbana, ne’ebé halo beibeik inspesaun hodi duni sira sai hosi espasu públiku ne’e.

“Fatin ne’e la merese atu faan duni, maibé ami tenke faan tanba ami-nia moris ne’e dependente ba faan ikan ne’e. Ami hakarak duni sidade Dili sai moos no ijiéne, maibé Governu mós tenke kria kondisaun ne’ebé mak estratéjiku ba ami negosiante ikan sira, nune’e ema bele sosa ami-nia ikan,” Negosiante ikan, Jacob Soares Gama, hateten ba Agência Tatoli iha Jardin Largo de Lecidere iha Lecidere, foin lalais ne’e.

Ezemplu, nia dehan, Governu fó fatin dook hosi fatin rame ne’e susar ba negosiante ikan sira tanba faan ikan ne’e la hanesan ho sira ne’ebé faan nuu no sasán sira seluk, tanba ikan kuandu loron ida tomak ema la sosa mak nia sei sai dodok no dois, entaun dala baran ikan sira ne’e soe de’it.

“Solusaun di’ak mak tenke fo fatin estratéjiku ida faan iha tasi ibun no iha ne’ebé komunidade halo movimentasaun barak. Ha’u rekomenda, Governu reativa fali fatin uluk tempu Governu anteriór nian, faan iha dalan públiku Lecidere nian besik Jardim Prezidente Repúblika B.J. Habibie nian ne’e,” nia dehan.

Iha iha Governu anteriór nia tempu ne’e, nia dehan, negosiante ikan muda ba merkadu Taibesi ona maibé iha fatin ne’eba ika la folin, tanba trankadu ho ema faan sasán seluk no faan karreta-motór.

“Ita iha ne’ebá loron tomak dala ruma ema la sosa, tanba laiha espasu la’o nian hodi tama ba merkadu. Ida-ne’e ami labele hein to’o mate. Ami tenke buka meiu oinsá atu hetan osan, hodi sustenta família uma-laran. Ne’ebé, ami rekomenda ba Governu, se bele kria kondisaun ruma besik tasi-ibun, labele iha Bidau Santa Ana,” nia rekomenda.

Governu hatudu ona fatin iha Bidau Santana ne’e di’ak ona ,maibé ida-ne’e dalan públiku ba turista sira la’o no tuur hodi haree no han-hemu, entaun dala barak sosa-na’in sé mak atu ba ne’ebá hodi sosa ikan hirak ne’e.

“Ami hakarak fatin, ezemplu, bainhira ema sai hosi servisu liu ba-mai hodi sosa. Agora, iha Bidau Santa Ana ne’e dook, ema la ba ne’ebá. Nusa mak Governu labele reativa fali fatin ida uluk ami faan iha tasi-ibun Lecidere nian ne’e. Bainhira taka tiha, ami-nia moris defisil no faan ho kondisaun halai ba-mai no laiha fatin ne’ebé di’ak ba ami atu faan ikan,” Gama dehan.

Hatán ba preokupaun no rekomendasaun ne’e, Sekretáriu Estadu Toponímia no Organizasaun Urbana (SEATOU), Germano Santa Brites Dias, hateten Bidau Santa Ana mak fatin própriu ba negosiante ikan sira atu faan ikan iha ne’eba.

“Ikan ba faan hotu iha Bidau Santa Ana nian, semitériu Bidau nia oin ne’e, tanba ne’eba fatin di’ak ba negosiante ikan. Ikan labele mai faan fali iha Largo Lecidere nia oin, tanba jardin Largo Lecidere ne’e ema tuur atu hola anin. Husu negosiante ikan sira labele buka razaun dehan folin ka lae. Ida-ne’e la’ós razaun ba ita depois ema han ikan mak buka ita, la’ós ita mak ba buka ema no lori tuir ema hodi faan iha trotoar leten, ne’e labele. Ba Largo Lecidere, ita organiza ona hodi ema faan nuu maibé tenke ho tenda ne’ebé mak moos,” Governante ne’e hateten.

Maibé, nia dehan, se negosiante ikan sira la kumpre hodi faan nafatin ikan Jardin Largo de Lecidere noa oin ne’e, mak ekipa konjunta sei hasai sira hosi fatin ne’ebá no hotu-hotu sei ba faan iha merakdu Taibeso no laiha razaun dehan ema la sosa.

Servisu Munisipál Jestaun Merkadu no Turizmu, Arthur Henriques, hateten fatin propriu ba faan ikna mak iha Bidau Santana ne’e, tanba fatin refere ne’e Governu halo ona sensibilizasaun ba komunidade liuhosi xefe aldeia, xefe suku sira no halo verbalmente hosi ibun ba ibun.

“Maibé sira kontinua faan no kuandu ami liu ba haree fatin sira, ekipa konjunta laiha ona no ami ami fila, negosiante ikan sira tama fali mai faan fatin públiku ne’e, ida-ne’e ladi’ak,” nia dehan.

Ho ida-ne’e, nia husu ba komunidade liuliu negosiante ikan atu kontribui ba sidade Dili ne’ebé moos no ijiéne tanba kapitál Dili ne’e vizitante mai tama-sai barak entaun tenke hatudu netik sidade matak no furak.

“Hatudu ona fatin mak la kumpre mak ita sei tun hodi foti ikan sira-ne’e, entrega ba orfonatu ka uma mahon sira iha Dili laran,” nia dehan.

Jornalista : Osória Marques

Editór      : Cancio Ximenes