DILI, 02 outubru 2023 (TATOLI)–Governu liuhosi reuniaun Konsellu Ministru extraordinária, segunda ne’e, delibera ona hodi aprova tetu despeza Orsamentu Jerál Estadu (OJE) ba tinan 2024 ho valór globál biliaun $1,6.
“Montante ida-ne’e reflete redusaun 18%, ekivale millaun $360, kompara ho OJE tinan 2023,” Ministra Finansa, Santina José Rodrigues Viegas Cardoso, relata hafoin reuniaun ezekutivu, iha Palásiu Governu.
Tetu agregadu hamutuk biliaun $1,6 inklui dotasaun ba administrasaun sentrál $1.458.292.345, seguransa sosiál $81,707.655 no Rejiaun Administrativa Espesiál Oé-cusse Ambenu (RAEOA) $60.000.000. Valór ida-ne’e la inklui Fundu Rezerva Seguransa Sosiál ho montante $162.007.651.
Notísia relevante : Xefe Governu atualiza preparasaun OJE 2024 ba Horta
Hosi montante ne’e, saláriu no vensimentu hetan alokasaun $400.276.781 (redusaun 14% kompara ho tinan 2023), bens no servisu $254.767.075 (redusaun 36%), kapitál menór $247.320 (redusaun 14%), kapitál dezenvolvimentu $177.606.384 (redusaun 23%), transferénsia públika 767.102.440 (redusaun 13%).
Nune’e, instituisaun Estadu sira sei finaliza sira-nia proposta orsamentu hodi Komité Revizaun Orsamentál bele halo analiza iha loron 23 outubru to’o loron 09 novembru.
Aleinde ne’e, Konsellu Ministru sei aprova projetu proposta lei OJE 2024 iha loron 14 novembru no sei entrega ba Parlamentu Nasionál iha loron 24 novembru 2023.
Jornalista : Antónia Gusmão
Editora : Julia Chatarina
