VIQUEQUE, 02 outubru 2023 (TATOLI)—Diretór Servisu Sekretaria Estadu Formasaun Profisionál no Empregu (SEFOPE) Viqueque, Simões da Silva, introdús programa tolu ba joven iha suku Uaimori, postu administrativu Viqueque Vila, munisípiu Viqueque.
“Papel SEFOPE nu’udar órgaun sentrál Governu ne’ebé responsável ba área prinsipál tolu hanesan formasaun, auto empregu no traballu atu ita-nia joven sira iha área rurál bele asesu ba programa tolu ne’e, tanba joven hosi suku Uaimori menus asesu informasaun liuhosi meiu rede sosiál,” Diretór hateten iha sede suku Uaimori, segunda ne’e.
SEFOPE daudaun ne’e planeia hela formasaun lian inglés ba joven sira iha munisípiu Viqueque, nune’e Diretór husu joven ne’ebé iha interese konkorre vaga serbisu iha Austrália bele prepara-an no akompaña informasaun.
“Ami sempre fó sai vaga serbisu bá Austrália liuhosi rede sosiál. Daudaun ami halo hela short list ba joven sira ne’ebé uluk aplika ba vaga online, karik joven Uaimori konkorre hotu karik tenke akompaña tanba ida-ne’e sistema. Se ita tarde minutu balun de’it, empreza bele troka. Tanba ne’e ha’u husu ba joven sira ne’ebé aplika ona vaga Autrália, tenke hakbesik ba liña internet matubele asesu ba informasaun tanba suku ida-ne’e laiha rede internet,” nia akresenta.
Notísia relevante : SEFOPE hahú identifika fatin ba sentru formasaun dalen Inglés-Korea iha Viqueque
Jerente servisu munisipál ne’e nota, dala ruma tanba joven tarde asesu informasaun.
“Ho ida-ne’e, ha’u prefere joven sira ne’ebé naran sai ona iha empregu tenke ba besik iha munisípiu atu nune’e bele asesu liña internet. Se lae joven sira hanoin ami maka hatama ami-nia ema, ne’e ami simu insulta barak,” nia salienta.
SEFOPE rejista joven rua ne’ebé partisipa formasaun móvel iha área ospitalidade daudaun ne’e asesu ona serbisu.
Sentru formasaun Beaço oferese formasaun ba pedreiru, karpintária, kanalizasaun, soldadura, no eletrisidade.
Iha fatin hanesan, Xefe suku Uaimori, Francelino A. Gomes, konsidera programa SEFOPE pertenente tebes ba joven sira iha suku tanba daudaun ne’e joven barak maka ramata sekundáriu, maibé sira la partisipa formasaun tanba menus informasaun.
“Ha’u sei pasa ba ha’u xefe aldeia sira hodi bele asesu ba formasaun sira ne’ebé SEFOPE prepara ba joven sira,” nia hato’o.
Jornalista : Vitorino Lopes da Costa
Editora : Julia Chatarina
