DILI, 02 outubru 2023 (TATOLI)–Timor-Leste no Portugal sei selebra akordu rua kona-ba administrativu ba aplikasaun konvensaun no mobilidade traballadór timor-oan nian.
“Konsellu Ministru delibera ona hodi autoriza asinatura akordu administrativu ba aplikasaun konvensaun entre Timor-Leste no Portugal kona-ba seguransa Sosiál no memorandu entendimentu entre Ministériu Traballu, Solidariedade Sosiál no Inkluzaun Portugal no Sekretaria Estadu Formasaun Profisionál no Empregu Timor-Leste,” Ministru Prezidénsia Konsellu Ministru, Agio Pereira, relata hafoin reuniaun ezekutivu, iha Palásiu Governu, segunda ne’e.
Akordu rua ne’e sei asina hosi Ministra Solidariedade Sosiál no Inkluzaun, Verónica das Dores no Sekretáriu Estadu Formasaun Profisionál no Empregu, Rogério Araújo Mendonça, durante vizita ofisiál ba Portugal iha tempu badak.
Notísia relevante : Akordu mobilidade entre Estadu Membru CPLP iha faze negosiasaun finál
Akordu dahuluk ho objetivu atu permite artikula no koloka ho vigór konvensaun seguransa sosiál, ne’ebé permite katak sidadaun timor-oan no portugés sira bele hetan benefísiu iha país rua, ho benefísiu seguransa sosiál ne’ebé hanesan hosi nasaun rua.
“Nune’e, iha futuru timor-oan sira bainhira sira husu reforma, bainhira sura, sira bele halo kálkulu pensaun nian kona-ba deskontu ne’ebé sira halo ona durante serbisu iha Portugal,” nia esplika.
Akordu daruak ho objetivu atu fasilita no organiza ho forma institusionál entrada timor-oan sira ba Portugal hodi buka serbisu.
Ho akordu ida-ne’e, timor-oan nia asuntu migrasaun bele trata iha Portugal ho dalan ofisiál, ne’ebé autoridade portugés sei fasilita prosedimentu sira ne’ebé presiza hodi hetan vistu serbisu.
Jornalista : Antónia Gusmão
Editora : Julia Chatarina
