Autoridade Covalima deside Covalima-oan kontribui $10-$2 konstrui santuáriu
COVALIMA, 03 Outubru 2023 (TATOLI)—Administradór Munisípiu Covalima, Francisco de Andrade, hamutuk ho entidade sira deside kada funsionáriu públiku no sarani sira kada xefe família kontribui osan atu konstrui santuáriu ba padre na’in-tolu (3) ne’ebé mate iha masakre negro 1999 iha igreja Avé Maria Suai.
Notísia Relevante: Covalima-oan planeia harii Padre Hilario-Francisco-Dewanto nia estátua iha Covalima
“Ohin, ita mai foti desizaun atu halo konstrusaun santuáriu padre na’in-tolu nian. Nune’e, ha’u foti desizaun kada funionáriu kontribui osan $10.00. Ha’u la haree ba nivél no sarani sira kada xefe família kontribui $2.00, hodi konstrui Santuáriu ba Padre Hilário Madeira, Padre Tarsisius Dewanto no Padre Francisco Soares, iha Covalima,” Francisco de Andrade hateten liuhosi diskursu iha salaun antigu igreja Avé Maria Suai, tersa ne’e.
Autoridade Covalima ne’e hateten, padre na’in-tolu ne’e mate tanba salva sarani barak ne’ebé refujia iha igreja Avé Maria Suai nia laran, ho nune’e presiza fó kontribuisaun no konstrui padre na’in-tolu nia santuáriu hodi komemora masakre setembru negro 1999 ba dala-25 iha tinan oin (2024) mai.
Konstribuisaun ba kada funsionáriu $10.00 ne’e to’o iha fulan hira mak termina ne’e seidauk deside, tanba depende orsamentu atu halo konstrusaun santuáriu refere ho totál orsamentu rihun $162-resin ne’e kobre ona mak foin bele hapara kontribuisaun kada fulan.
Atu halo konstrusaun santuáriu ba padre na’in-tolu ne’e la’ós funsionáriu mesak de’it maibé presiza mós sarani-sira no mós emprezáriu Covalima-oan sira-nia kontribuisaun mós.
Reprezenta Prezidente Konsellu Veteranu Covalima, Joaquim Barros, hateten enkontru ohin atu halo preparasaun ba komemorasaun masakre setembru negro 1999 ba dala-25 iha tinan 2024, maske kada tinan Covalima-oan sira sempre komemora trajedia ida-ne’e.
“Komemorasaun masakre setembru negro 1999 iha tinan 2024 ne’e, atu halo diferensa nune’e fó ideia ba malu atu konstrui santuáriu ba padre na’in-tolu iha munisípiu Covalima,” nia dehan.
Prezidente Komisaun Organizadora, Domingos Oliveira “Foti Riba”, hateten Covalima-oan hala’o enkontru relasiona fó apoiu finanseira atu konstrui santuáriu ba Padre Hilário Madeira, Padre Tarsisius Dewanto ho Padre Francisco Soares.
“Ita mai hamutuk, hanesan Suai-oan atu fó hanoin ba malu prepara finanseira atu halo konstrusaun santuáriu iha ámbitu atu komemora tinan 25 masakre setembru negro 1999, iha tinan 2024,” nia dehan.
Konstrusaun santuáriu ba Padre Hilário Madeira, Padre Tarsisius Dewanto no Padre Francisco Soares ne’e hanesan istória memória pasada ba masakre setembru negro 1999 ne’e, hanesan memóra viva ida liuhosi konstrui santuáriu.
Notísia Relevante: Dezeñu santuáriu Padre Hilario-Francisco-Dewanto finaliza ona
Jornalista : Celestina Teles
Editór : Cancio Ximenes
