COVALIMA, 21 fevereiru 2023 (TATOLI)—Covalima-oan sira plaeia no sei konstrui santuáriu no harii padre Hilario Madeira, Padre Tarsisus Dewanto no Francisco Soares hamutuk ho sarani sira-ne’ebé mate iha masakre igreja Ave Maria Suai iha 06 setembru 1999, nia estátua iha Covalima.
Notísia Relevante: Masakre Setembru Negro nia hun mai hosi 26 fevereiru 1999
“Ohin hala’o enkontru ne’e hodi ko’alia kona-ba atu fó kontribuisaun tinan 25 hodi prepara konstrui santuáriu no harii estátua padre na’in-tolu bainhira tinan 25 mai sei inaugural. Se laiha preparasaun entaun mai hanesan fatin baibain,” Prezidente Komisaun Organizadora, Domingos Oliveira “Fotiriba”, hateten ba jornalista sira iha salaun igreja antigu Ave Maria Suai, tersa ne’e.
Ho nune’e, Komisaun Organizadora prepara realiza enkontru ho pároko no administradór munisípiu, veteranu, sobrevivente no funsionáriu sira, oinsa atu konstrui santuáriu no harii estatua padre na’in-tolu hamutuk ho sarani sira-ne’ebé mate iha igreja Ave Maria Suai.
“Tanba ho sira-nia mate mak ita-nia moris no ohin ita bele goza. Entaun, oinsá bele lolo-liman ba malu atu fó kontribuisaun ita konstrui santuáriu no harii padre nain tolu nia estátua iha Covalima,” nia dehan.
Enkontru ba dahuluk hodi halo preparasaun atu halo dezeñu hafoin bele hatene orsamentu atu harii estátua padre na’in-tolu nian hafoin bele deside Covalima-oan atu halo kontribuisaun no bainhira la sufisiénte sei husu apoiu hosi Governu.
Pároko Igreja Ave Maria Suai, Sebastião Eugenio da Cruz Correia, hateten Covalima-oan realiza enkontru atu konstrui santuáriu no harii padre na’in tolu nia estátua hamutuk ho sarani sira-ne’ebé mate iha igrejaAave Maria Suai iha 1999 liubá ne’e.
Notísia Relevante: Biki’ak: “Masakre 06 setembru lori ha’u moris iha infernu laran”
“Ohin, ami enkontru ne’e atu konstrui santuáriu ba padre na’in-tolu no ba sarani sira-ne’ebé mate iha masakre setembru negro 1999. Fatin ida-ne’e istóriku, ha’u hanesan pároko bazea ba istória sei harii estátua padre na’in-tolu hodi konstrui mós Jardin ida, nune’e ita bele atrai sidadaun sira,” nia hateten.
Hafoin konstrui santuáriu ona, estátua padre na’in-tolu hamutuk ho sarani sira-ne’ebé mate, nia benefisiu la’os de’it ba uma kreda maibé atrai sidadaun esranjeiru sira halo vizita no mós sira ne’ebé mak iha ótel no restorante sira.
Entertantu, trajédia Masakre Setembru Negro Suai (06 de setembru 1999), rezulta vítima hanesan sarani ka povu Suai-oan no Timoroan sira seluk 100-resin hamutuk no Bibi atan Uma Kreda Katólika na’in-tolu, Pedre Hilario Madeira, Pedre Farncisco Soares no Pedre Tarcisus Dewanto, ne’ebé hetan oho hosi milísia prointregrasaun iha Igreja Ave Maria Suai.
Masakre ne’e akontese bainhira Sekretáriu Jerál Nasaun Unida, Kofi Annan, anúsniu rezultadu referendu (konsulta popular) iha 04 setembru 1999, katak povu Timor-Leste maiória hili Timor-Leste haketak-an hosi Indonézia.
Notísia Relevante: Setembru Negro : Ema Sona Pe. Hilario Uza Au-Fafulu
Jornalista : Celestina Teles
Editór : Cancio Ximenes
