iklan

NASIONÁL, HEADLINE

Embaixadór EAU hato’o konvite COP28 ba PM Xanana

Embaixadór EAU hato’o konvite COP28 ba PM Xanana

Primeiru-Ministru, Kay Rala Xanana Gusmão, komprementa Embaixadór Emiradu Árabe Unidu ba Indonézia no ASEAN, Abdulla Salem Al Dhaheri, iha Palásiu Governu, tersa (03/10/2023). Imajen Tatoli/Francisco Sony

DILI, 03 outubru 2023 (TATOLI)Primeiru-Ministru (PM), Kay Rala Xanana Gusmão, tersa ne’e, simu vizita hosi Embaixadór Emiradu Árabe Unidu (EAU) ba Indonézia no Timor-Leste Naun Rezidente, Abdulla Salem Al Dhaheri.

Iha hasoru malu ne’e, Embaixadór hato’o karta hosi entidade a’as EAU ba Xefe Governu, hodi partisipa iha Konferénsia Nasaun Unida ba Alterasaun Klimátika (COP28), ne’ebé sei realiza iha Dubai, EAU, iha loron 30 outubru to’o 12 novembru 2023.

“Ha’u hato’o konvite hosi ami-nia Prezidente no Primeiru-Ministru ba Primeiru-Ministru Xanana Gusmão, hodi partisipa iha COP28, kona-ba reuniaun nível a’as mudansa klimátika,” Embaixadór hateten hafoin hasoru Xefe Governu, iha Palásiu Governu.

Notísia relevante : PN ratifika konvensaun alterasaun klimátika

Durante dada-lia, Embaixadór hato’o mós karta hosi Prezidente UEA, Zayed Bin Sultan Al Nahyan, no Primeiru-Ministru, Maktoum Bin Rashid Al, ba Xanana Gusmão. Ligadu ho konvite ne’e, PM Xanana seidauk promete atu partisipa maibé hato’o agradese tanba bele konvida ona.

“Maibé Xefe Estadu Timor-Leste konfirmadu ona katak sei partisipa iha simeira ne’ebé sei realiza iha loron 01 to’o 02 dezembru 2023, iha Dubai. Iha ámbitu ne’e selebra mós aniversáriu Estadu Emiradu Árabe Unidu ba dala-52,” nia informa.

Biban ne’e, parte rua ko’alia oitoan kona-ba vizita Xefe Estadu, José Ramos Horta ba EAU iha tempu badak.

Aleinde ne’e, diskute mós kona-ba kooperasaun iha área prioridade ne’ebé mak país rua bele explora hodi bele hametin kooperasaun bilaterál.

“Iha kontestu ida-ne’e ko’alia mós posibilidade asina akordu rua atu nune’e bele loke odamatan hodi sai baze ida hodi explora liután poténsia kooperasaun iha área explorasaun mina, gás, no infraestrutura,” nia dehan.

Embaixadór ne’e espera katak tempu badak bele realiza asinatura akordu rua hodi bele implementa konkretamente hafoin vizita Estadu Prezidente Repúblika Horta nian.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!