OÉ-CUSSE, 03 outubru 2023 (TATOLI – Komandante Polísia Nasionál Timor-Leste (PNTL), Rejiaun Administrativu Espesiál Oé-Cusse Ambeno, Superintendente Xefe Nicolau Francelino da Costa, informa, membru efetivu no transporte sei menus iha komandu PNTL Oé-Cusse maibé nu’udar seguransa iha komitmentu atu asegura eleisaun lideransa komunitáriu hodi la’o ho susesu iha rejiaun ne’e.
Notísia relevante: STAE RAEOA propoin viatura 30 ba eleisaun suku
“Relasiona ho planu Governu atu realiza eleisaun suku sei akontese iha loron 28 outubru 2023 ne’e, preparativu hosi komandu PNTL Rejionál, ita preparadu no prontu atu asegura eleisaun lideransa komunidade iha Oé-Cusse hodi la’o ho susesu, mezmu parte PNTL enfrenta membru limitadu tebes,” Superintendente Xefe Nicolau Francelino da Costa, ba jornalista sira iha Oé-Cusse, tersa ne’e.
“Maibé komandu PNTL Oé-Cusse ita iha komitmentu boot, prontu no preparadu atu responde eventu nasionál ne’e,” nia afirma.
Nia hateten, kona-bá membru, komandu PNTL Oé-Cusse la sufisiente, tanba daudaun ne’e membru PNTL efetivu ativa hamutuk na’in-124 de’it, ne’ebé labele kobre hotu sentru votasaun sira-ne’ebé destaka iha aldeia 63 iha Oé-Cusse, maibé komandu PNTL RAEOA sei komunika ba komandu jerál, nune’e bele apoia membru efetivu iha Oé-Cusse.
“Ita-nia transporte sira barak maka kondisaun grave, iha balu de’it mak di’ak, maibé sei labele kobre hotu área rurál sira iha Oé-Cusse, hakarak ka lakohi, ami tenke husu ba komandu jerál, atubele apoia mós transporte ba komandu Oé-Cusse, nune’e bele fasilita di’akliu movimentu seguransa atu asegura eleisaun komunitáriu ne’e iha fatin hotu-hotu,” nia katak.
Tuir nia, tanba sentru votasaun barak mak iha área rurál, fatin izoladu sira, entaun presiza prezensa PNTL iha fatin sira-ne’e, nune’e bele asegura no fó seguransa hodi garante eleisaun ne’e la’o ho susesu, entaun presiza transporte ho kondisaun di’ak.
Notísia relevante: CNE Oé-Cusse konklui edukasaun sívika iha sub-rejiaun tolu
Jornalista: Abílio Elo Nini
Editór: Evaristo Soares Martins
