iklan

EKONOMIA, HEADLINE

Governu altera regulamentu programa orsamentál

Governu altera regulamentu programa orsamentál

Primeiru-Ministru, Kay Rala Xanana Gusmão, prezide reuniaun Konsellu Ministru, iha Palásiu Governu, kuarta (04/10/2023). Imajen Tatoli/Francisco Sony

DILI, 04 outubru 2023 (TATOLI)Governu liuhosi reuniaun Konsellu Ministru (KM), kuarta ne’e, aprova projetu dekretu Governu, ne’ebé aprezenta hosi Ministra Finansa, Santina José Rodrigues Viegas Cardoso, kona-ba alterasaun dahuluk dekretu Governu númeru 18/2022, loron 11 maiu, ne’ebé regula programa orsamentál sira.

“Esperiénsia implementasaun orsamentasaun tuir programa rekomenda hodi halo ajuste ki’ik ba diploma ne’e, liu-liu kona-ba limitasaun númeru programa sira ne’ebé relasiona ho despeza investimentu no estruturasaun programa ne’ebé iha relasaun ho despeza funsionamentu nian,” Ministru Prezidénsia Konsellu Ministru, Agio Pereira relat,  hafoin reuniaun ezekutivu, iha Palásiu Governu.

Notísia relevante : Xanana defende orsamentu bazeia ba programa hodi labele gasta osan arbiru

Tanba ne’e, kona-ba konstrusaun programa orsamentál sira, estabelese agora katak kada títulu orsamentál bele inklui másimu programa tolu ne’ebé asosia ba despeza investimentu.

Nune’e, programa ne’ebé destina ba despeza funsionamentu ne’e sei subdivide ba sub-programa ne’ebé abranje funsionamentu institusionál no dezenvolvimentu institusionál.

“Kona-ba programa sira ne’ebé relasiona ho despeza investimentu, hirak ne’e sei fahe ba sub programa ne’ebé korresponde ba área atuasaun servisu oin-oin no entidade setór públiku administrativu nian, exetu títulu ‘Dotasaun Jerál Estadu’ no títulu espesiál sira ne’ebé laiha baze orgánika,” nia akresenta.

Iha biban hanesan KM aprova projetu dekretu Governu, ba alterasaun dahuluk dekretu Governu númeru 19/2022, loron 11 maiu, kona-ba klasifikadr orsamentál, ne’ebé aprezenta hosi Ministra Finansa.

Objetivu alterasaun ne’e atu fasilita kompriensaun klasifikasaun ekonómika foun reseita no despeza públika, ho objetivu atu redús kategoria reseita ba ualu no despeza ba lima, ne’ebé mantein detallu hanesan iha nível rubrika no sub-rubrika.

Governu halo mós ajusta kódigu klasifikasaun ekonómika no klasifikasaun funsionál atu halo detalla kategoria operasaun estraorsamentál sira, nune’e mós atu halo korresaun ki’ik ba klasifikasaun.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!