Governu hahú halo intervensaun folin foos iha Viqueque
VIQUEQUE, 04 outubru 2023 (TATOLI)–Governu liuhosi Ministériu Koordenadór Asuntu Ekonómiku (MKAE), Ministériu Komérsiu no Indústria (MKI) inklui Sentru Lojístika Nasionál (CLN, sigla portugés), kuarta ne’e, hahú halo intervensaun ba folin foos iha munisípiu Viqueque.
Biban ne’e, Administradór munisípiu Viqueque, Januário Soares ‘Bolly’, hateten, folin foos daudaun ne’e iha merkadu sa’e maka’as, foos kilograma 25 agora ho folin $18 to’o $21 iha territóriu tomak, nune’e Governu deside hodi halo intervensaun.
“Ita espera bele refleta ba folin sembako sira seluk, atu normaliza hikas folin foos no nesesidade báziku povu iha territóriu laran tomak. Governu halo intervensaun ho foos tonelada 2.300, ne’ebé kada saku kilograma 25 sei fa’an ba abitante no merkadu sira iha teritóriu nasionál ho folin $12,” Administradór relata iha atividade lansamentu intervensaun foos, iha resintu administrasaun munisipál, kuarta ne’e.
Notísia relevante : Governu lansa intervensaun merkadu ho foos lokál tonelada 2.300
Autoridade munisipál nota katak kuantidade foos ne’ebé aloka sei la to’o atu hatan ba nesesidade hotu iha merkadu maibé Governu konsege hatudu ona interese ba problema nasionál.
“Folin foos sa’e iha nível rejionál no mundiál tanba nasaun produtór foos sira hamenus importasaun ba nasaun seluk no efeitu hosi bai-loro naruk, liu-liu atu asegura soberania ka seguransa ai-han ba krize mundiál,” nia akresenta.
Nia dehan, Governu halo intervensaun folin foos hodi normaliza folin foos iha merkadu, tanba ne’e nu’udar Autoridade munisípiu, husu ba abitante no emprezáriu hotu iha Viqueque hodi labele aproveita oportunidade hodi manipula folin nesesidade bázika ba povu hodi buka lukru, maibé tenke ho responsabilidade no sentidu komun atu solusiona problema sosiál hirak ne’e iha komunidade nia le’et.
Januário espera Governu bele kontinua programa sosiál ne’ebé bele fó vantajen ba povu tomak hodi rezolve problema substansiál ekonomia ba povu sira, liu-liu iha área rurál.
Iha lansamentu ne’e, Administradór munisípiu Viqueque entrega foos kilograma 25 ba abitante sira ho folin $12.
Jornalista : Vitorino Lopes da Costa
Editora : Julia Chatarina
