DILI, 05 outubru 2023 (TATOLI) – Governu liuhosi Ministériu Koordenadór ba Asuntu Ekonómiku, Ministrériu Komérsiu no Indústria (MKI) koopera ho Sentru Lojístika Nasionál (SLN), atu lori foos bá munisípiu sira hodi halo intervesaun merkadu ho foos tonelada 2.300.
Lansamentu ba intervesaun merkadu ne’e, dirije hosi Vise Primeiru-Ministru, Ministru Koordenador ba Assuntu Ekonómiku, Ministru Turizmu no Ambiente, Francisco Kalbuadi Lay ho Ministru Komérsiu no Indústria, Filipus Nino Pereira.
Governu halo lansamentu ne’e ho objetivu atu responde presu foos ho folin ne’ebé sa’e to’o $18 kada saku 25Kg iha merkadu. Nune’e intervensaun ba foos lokál ne’e hamutuk tonelada 2.300 iha CLN Tibar ne’ebé kada saku 25Kg sei fa’an ba merkadu sira iha territóriu nasionál ho folin $12.
Vise Primeiru Ministru, Kalbuadi Lay, hateten lansamentu intervensaun ne’e nu’udar meiu ida hodi bele ajuda povu sira sosa foos bá nesesidade loron-loron nian.
“Foos tonelada 2.300 sei labele interven ba merkadu iha Timor laran hotu, maibé Governu hatudu nia vontade no interese boot atu ajuda povu,” refere nota ne’ebé Agência TATOLI husi gabinete Vice Primeiru-Ministru.
Tuir nian, foos folin sa’e ne’e la’ós iha Timor de’it, maibé akontese iha nivel rejionál no mundiál, tanba nasaun sira produtór foos hamenus exportasaun ba foos hodi prepara estoke ba sira-nia rai-laran iha situasaun bai-loron naruk no liuliu asegura sira-nia soberanu ai-han iha krize mundiál ikus ne’e.
Nune’e, Governante ne’e husu husu ba setór privadu sira atu labele aproveita situasaun krize mundiál hodi buka lukru maka’as, maibé persiza hatudu netik kolaborasaun ho Governu ba prosesu kontrusaun Estadu.
Iha biban hanesan, Ministru Komérsiu no Indústria, Filipus Nino Pereira, afirma, Governu halo intervensaun ida-ne’e hodi bele ajuda povu kbiit la’ek sira bele sosa foos.
“Governu lansa ona intervensaun fa’an foos iha merkadu territóriu nasionál hotu ho presu razoavel mak $12 kada saku 25kg. Intervesaun ne’e ho baze ba Dekretu-Lei ne’ebé fó sai husi Konsellu Ministru no promulga ona hosi Prezidente Repúblika,” nia reforsa
Tuir planu governu nian sei hahú uluk iha Munisípiu Díli hodi kontinua bá munisípiu seluk tan no fa’an diretamente husi Centro Lojistica Nasionál.
Notísia relevante:Folin foos iha kapitál Dili kontinua sa’e
Jornalista: Jesuína Xavier
Editor : Florencio Miranda Ximenes
