DILI, 04 outubru 2023 (TATOLI)—Governu liuhosi reuniaun Konsellu Ministru (KM), kuarta ne’e, aprova projetu rezolusaun Governu, ne’ebé aprezenta hosi Ministru Prezidénsia Konsellu Ministru, Agio Pereira, kona-ba kódigu konduta ba membru IX Governu Konstitusionál.
Ministru Agio esplika, diploma ne’e nu’udar kompromisu autorregulatóriu ne’ebé orienta konduta governante no membru sira hosi iha gabinete membru Governu bainhira hala’o sira-nia funsaun.
“Dokumentu ne’e ezije membru Governu sira adota postura ba prevensaun no kombate korrupsaun inklui konflitu interese. Kria mós regra lubuk ida ne’ebé iha relasaun ho oferta no benefísiu, nomós iha kombate ba asédiu seksuál no asédiu iha serbisu hodi asegura integridade no responsabilidade iha funsaun públika,” Ministru Prezidénsia Konsellu Ministru esplika hafoin reuniaun ezekutivu, iha Palásiu Governu.
Notísia relevante : Konsellu Ministru aprova tetu OJE 2024 biliaun $1,6
Kódigu ne’e abranje prinsípiu esensiál sira hanesan prosekusaun interese públiku, legalidade, transparénsia, imparsialidade no igualdade, integridade, onestidade, urbanidade no respeitu interinstitusionál.
“Adosaun ba kódigu konduta ida-ne’e reforsa kompromisu Governu IX Konstitusionál ho transparénsia, étika no responsabilidade hosi ninia membru sira bainhira hala’o sira-nia funsaun hodi promove konfiansa sidadaun ba instituisaun Estadu,” Ministru akresenta.
Jornalista : Antónia Gusmão
Editora : Julia Chatarina
