Progresu konstrusaun moru sentru saúde Suai atinje ona 30,19%
COVALIMA, 04 outubru 2023 (TATOLI)—Diretora Servisu Saúde Munisípiu Covalima, Maria Fátima Moniz, hateten progresu servisu fíziku ba konstrusaun moru sentru saúde Suai ne’ebé lokaliza iha suku Debos, postu administrativu Suai ne’e atinje ona 30,19%.
Notísia Relevante: Kompañia Hilobadi hahú rekonstrui moru sentru saúde Suai
“Progresu konstrusaun moru sentru saúde Suai, ita haree agora la’o hela. Foin lalais, sira relata progresu 30,19%, ho nune’e tékniku nafatin hala’o observasaun atu haree konstrusuan ne’e halo tuir dezeñu ka Planta no Kadernu em Kargu (BoQ=Bill of Quantity) ne’ebé iha,” Maria Fátima Moniz hateten ba ba Agência Tatol iha resintu Sentru Saúde Suai, kuarta ne’e.
Moru protesaun sentru saúde Suai ne’e konstrui hosi kompañia kontratór Hilobadi Unipesoál, Lda, ne’ebé hahú servisu iha loron 13 fulan-juñu 2023 ne’ebé sei ramata iha loron 31 fulan-novembru tinan 2023.
Realidade, nia hateten, progresu fíziku servisu ba konstrusaun refere iha terrenu ne’e tarde uitoan tanba momentusira konstrui ne’e iha tempu udan ne’ebé difikulta badaen sira atu hala’o servisu.
“Ita haree kompañia kontinua esforsu hala’o servisu no kompañia kontinua esforsu nafatin, nune’e bele finaliza lalais,” nia hateten.
Kompañia kontratór Hilobadi Unipesoál, Lda, hahú hala’o konstrusaun mora iha sentru saúde Suai ho nia montante orsamentu hamutuk $ 67,587.87.
Jornalista : Celestina Teles
Editór : Cancio Ximenes
