Tékniku CSI Covalima elabora dadus benefisiáriu bolsa da mãe kondisionál
COVALIMA, 04 Outubru 2023 (TATOLI)—Tékniku Rejistu Centro Solidariedade Sosiál no Inkluzasaun (CSI) Covalima hosi postu administrativu hitu halo elaborasaun dadus kandidatu benefisiáriu atu asesu bolsa da mãe kondisionál iha munisípiu Covalima.
Notísia Relevante: CSSI Covalima halo reajustamentu dadus benefisiáriu bolsa da mãe kondisionál
“Ami halo reajustamentu dadus bolsa da mãe kondisionál durante loron 10 finaliza ona no agora tékniku postu administivu hitu ne’ebé pertense ba munisípiu Covalima,” Diretór Sentru Solidariedade Sosiál no Inkluzasaun, Agapito Asis Cardoso, hateten ba Agência Tatoli iha nia kna’ar fatin, Suai Loro, kuarta ne’e.
Agora daudaun, nia hateten, tékniku sira tama ona iha faze elaborasaun dadus ba benefisiáriu bolsa da mãe kondisionál durante loron haat maibé bele mós liu ida-ne’e, no hafoin finaliza halo reajustamentu no tama iha faze eloborasaun tenke ho foku, nune’e elabora dadus tuir realidade iha terrenu.
Iha prosesu tékniku rejistu no tama iha faze halo elaborasaun dadus bolsa da mãe kondisionál seidauk bele hatene kandidatu benefisiáriu na’in hira, maibé hafoin finaliza foin bele hatene totál dadus benefisiáriu no sei relata ba nasionál.
Antes ne’e, iha 20 setembru 2023, pontu fokál bolsa da mãe kondisionál, Nelson de Jesus, fó sai dadus benefisiáriu bolsa da mãe kondisionál ne’ebé sira-nia naran iha lista hamutuk 4,579 atu halo reajustamentu.
Jornalista : Celestina Teles
Editór : Cancio Ximene.
