Bankada CNRT komunika hela Governu kona-ba kandidatu komisáriu CAC

DILI, 05 outubru 2023 (TATOLI)—Vise Xefe bankada CNRT iha Parlamentu Nasionál (PN), Deputadu Patrocínio Fernandes, hateten komunika hela ho Governu kona-ba preferénsia hosi bankada FRETILIN atu Governu presiza retira kandidatu komisáriu Komisaun Anti-Korrupsaun (CAC, siglá portugés) na’in-ida hodi avansa de’it na’in-ida.
Notísia Relevante: Bankada parlamentár seidauk iha konsensu ba eleisaun komisáriu CAC
Nia dehan, bankada FRETILIN nia pozisaun polítika de’it hanoin espresaun ne’e di’ak hodi halo entendimentu iha PN, nune’e komisáriu ida sai reprezenta votu Deputadu hotu nian tuir prosedimentu lei korum Deputadu 49 atu bele halo prosesu eleisaun.
“Ami buka hela entendimentu prosesu ne’e la’o hela negosiasaun no FRETILIN nia hakarak sai ho kandidatu ida, Governu mai ho kandidatu rua. Sei buka hela komunikasaun ho Governu halo oinsá mai ho kandidatu ida de’it,” Deputadu Patrocínio Fernandes hateten ba Agência Tatoli iha uma fukun PN, kinta ne’e.
Dadaun ne’e, bankada Governu iha Parlamentu Nasiuonál (PN) seidauk simu resposta ruma hosi Governu ba kestaun ne’e, nune’e nafatin komunika ba malu.
“To’o minutu ida-ne’e seidauk simu resposta, maibé fiar katak Governu iha vontade atu bele fó solusaun ba probelma ida-ne’e. Dezde Governu aprezenta kandidatu rua mai, depois Parlamentu hatete di’ak-liu ba ho komisáriu ida de’it para hatudu imajen Parlamentu katak komisáriu CAC ajente ida atu serbisu ba Estadu. Entaun, presiza hetan apoiu másimu hosi reprezentante povu sira,” nia hateten.
Antes ne’e, Xefe Bankada FRETILIN, Deputadu Aniceto Longuinhos Guterres Lopes, hateten preferénsia bankada nia hakarak konsensuál ba kandidatu komisáriu CAC mak iha kandidatu na’in-rua ne’ebé Governu aprezenta mai ida presiza retira hodi avansa de’it ho ema na’in-ida.
Jornalista : Nelson de Sousa
Editór : Cancio Ximenes

