DILI, 29 setembru 2023 (TATOLI)—Bankada Parlamentár seidauk iha konsensu ba eleisaun kandidatu komisáriu Komisaun Anti-Korrupsaun (CAC, siglá portugés).
Notísia Relevante: Eleisaun komisáriu CAC adia tanba bankada parlamentár laiha konsensu
Prezidente Parlamentu Nasionál, Maria Fernanda Lay, hateten iha reuniaun líder bankada ohin ko’alia kona-ba eleisaun komisáriu CAC maibé tenke iha konsensu.
“Ami ko’alia maibé tenke iha konsensu ida. Ne’ebé, ha’u hato’o fali ba, tanba Governu mak hato’o nia kandidatu mai, oinsá Deputadu kada bankada ida-idak atu foti nia pozisaun. Ita-boot sira (jornalista) ba husu bankada ida-idak ninian. Se sira permite ha’u tau iha ajenda tanba iha,se husu adia ha’u tuir saida mak bankada sira husu. Agora pendente (suspende) até próxima semana, kerdizer iha segunda no tersa mai, bele akontese no bele mós la akontese. Tanbasá, ha’u hateten hanesan ne’e, sei tau iha ajenda,” Prezidente PN ne’e hateten hodi responde Agência Tatoli iha uma fukun PN, sesta ne’e.
Tanba ne’e, nia la ko’alia iha ona konsensu ka lae no ida-ne’e husu ba bankada parlamentár sira mak hatene.
“Ba husu sira bankada mak ko’alia, tanba Prezidente Parlamentu Nasionál husu ita bele ajenda ka lae, ha’u mós dehan seidauk,” nia dehan.
Fernanda Lay hateten, kona-ba karta aseitasaun hosi kandidatu Sérgio Hornai ne’ebé antes ne’e seidauk haruka mai PN ne’e agora haruka ona mai, maibé iha problema seluk ne’ebé la presiza fó sai ba públiku.
Xefe Bankada CNRT, Deputadu Duarte Nunes, hateten sira-nia parte hasoru malu ona ho bankada parlamentár liuliu parte opozisaun, maibé hosi rezultadu hasoru malu ne’e hato’o ona ezijénsia balun ba iha Governu atu halo aranju ruma, nune’e presiza pasiénsia hein.
“Ami hasoru malu tiha soké ezijénsia balun ami iha lia menon balun tenke dudu ba Governu tenke haree took, oinsá mak buat ne’ebé mak ami hakarak hetan ne’e bele iha rezultadu ne’ebé di’ak. Ne’e la’ós parte hotu-hotu kontribui, konsensu iha soké ajusta ne’e la’ós ami mesak. Ne’ebé, ita pasiénsia uitoan,” nia hateten.
Deputadu Duarte la ko’alia kona-ba ezijénsia saida tanba ne’e asuntu interna nune’e hein ba to’o ajenda eleisaun.
Xefe bankada FRETILIN, Aniceto Longuinhos Guterres Lopes, hateten bankada sei la blokeia prosesu ne’e no sei ba partisipa iha eleisaun ba komisáriu CAC, tanba ne’e órgaun Estadu no interrese Estadu nian, nune’e sei kolabora.
“Maibé, ami kuandu ba partisipa atu hetan konsensu kona-ba kandidatu. Ami iha tiha ona preferénsia. Pelumenus bankada rua CNRT ho FRETILIN konkorda ona ba kandidatu ida. Agora partidu boot rua ne’e konkorda ona ba kandidatu ida, entaun ida seluk la hetan apoiu ne’e di’ak liu retira, ida-ne’e mak ami hein hela bainhira mak nia retira,” nia dehan,
Nune’e, nia dehan, FRETILIN hakarak mensajen ba povu tomak katak ami iha PN iha kapasidade atu kria konsensu kona-ba interrese Estadu nian.
Entaun, bankada hakarak ezije kandidatu sira mós bele kolabora ho intensaun polítika ida-ne’ebé ita hakarak kria konsensu ho objetivu hakarak komisáriu ida ho konsensuál.
Tanba agora kandidatu rua, entaun kandidatu mós tenke konsensuál ida hodi avansa ba eleisaun.
“Ne’e mak ami sei halo hela esforsu, liuliu bankada CNRT ho bankada sira seluk, pelumenus dadeer ne’e ha’u hetan ona informasaun bankada PD mós ami komunga pozisaun hanesan tenke iha konsensu,” nia hateten.
Tanba seidauk ne’e, nia dehan, bankada Governu halo hela esforsu.
“Ohin, hau dehan tiha ona apoiu ba kandidatu ida-ne’e ami-nia preferénsia iha hotu ona no konkorda hotu ona, entaun ida-ne’ebé la hetan apoiu ne’e di’ak-liu husik nia rezigna aan, hodi ita avansa ona ba votasaun. Loos, problema mak ida-ne’e. Agora, ida seluk, nia la hetan apoiu ne’e agora nia sei tenta halo aproximasaun ba-mai ne’e halo saida,” nia dehan.
Nia dehan. aproximasaun ne’e mak problema kompreensaun hosi kandidatu ne’ebé la hetan apoiu. Se apoiu partidu boot ba kandidatu A entaun tuir loloos kandidatu B retira, tanba FRETILIN nia interrese mak ida-ne’e. Se ba partisipa ne’e atu hetan konsensu, se ba partisipa vota ba kandidatu rua halo saida.
Jornalista : Nelson de Sousa
Editór : Cancio Ximenes
