Edifísiu saúde Baucau muda provizóriu bá fatin izolamentu
BAUCAU, 05 outubru 2023 (TATOLI) – Edifísiu Serbisu Munisipál Saúde Baucau provizoriumente muda ba eis Eskola Saúde (SPK, sigla indonézia) ne’ebé antes ne’e utiliza ba fatin izolametu Covid-19.
Diretór Serbisu Munisipál Saúde Baucau, Domingos Reinaldo da Costa Guterres, esplika, desizaun muda fatin atendimentu tanba hafoin mosu kazu akontesimentu inséndiu iha edifísiu Saúde Baucau Riamare, Bahu.
“Sasan sorin muda ona ba, enkauntu balun hela iha edifísiu tanba programa balun sei halao serbisu iha ne’ebá,” Diretór Serbisu Munisipál Saúde Baucau hateten liuhosi telemovél, kinta ne’e.
Parte Saúde Baucau informa ona kazu inséndiu refere no submete ona relatóriu provizóriu ba Ministériu Saúde nune’e ekipa hosi nasionál to’o iha terrenu hodi idenfika kauza hosi akontesimentu ne’e.
Sala izolamentu ne’ebé atuál utilza ba atendimentu saúde seidauk sufisiente nune’e parte dirijente munisípiu husu ba nasionál atu aselera prosesu hotu nune’e bele reabilita hikas edifísiu Serbisu Munisipál Saúde Baucau.
“Vise Ministru saúde orienta ona diretór nasionál lojístiku observa kondisaun iha terrenu,” Domingos Guterres akresenta.
Domingos Guterres, argumenta, kauza loloos too agora seidauk hatene nune’e forma ona ekipa investigasaun kompostu munisípiu hamutuk ho ekipa nasionál hodi identifika kauza hosi akontesimentu refere.
Notísia relevante: Ahi han edifísiu saúde Baucau
Jornalista : Natalino Belo
Editór : Evaristo Soares Martins
