Ezekusaun UNP iha Oé-Cusse tarde
OÉ-CUSSE, 05 outubru 2023 (TATOLI – Diretór Programa Nasionál Dezenvolvimentu Suku (PNDS) Rejiaun Administrativa Espesiál Oé-Cusse Ambeno (RAEOA), Tomas Boquifai, hateten, progresu ezekusaun programa Uma Naroman Povu (UNP) iha Oé-Cusse tarde.
Notísia relevante: Xefe suku sira husu Parlamentu Nasionál fiskaliza ezekusaun PNDS iha Oé-Cusse
Tomas Boquifai, informa, projetu ba programa UNP ezekuta iha agostu no tenki termina iha outubru 2023 ne’e, maibé to’o agora foin inaugura suku neen iha sub-rejiaun Oésilo, Pante Makasar no Nítibe.
“Maibé ita nafatin esforsa atu finaliza antes udan monu rai, tanba iha difikuldade dalaruma fornesedór sira hatun materiál tarde, entaun ita nafatin bolu atensaun, nune’e bele halais servisu antes udan bele entrega ona ba benefisiáriu sira,” Tomas Boquifai, ba Tatoli iha Oé-Cusse, kinta ne’e.
Nia informa, matadalan PNDS fó dalan kona-bá prosesu implementasaun, primeiru Ekipa Jestaun Suku (EJS) ho KPA iha kompeténsia tomak atu konfirma direita ba fornesedór sira, no bele halo avaliásaun no bele halo xamada atensaun atu submete justifikasaun.
“Iha setembru ne’e ita hapara ona fornesedór balun iha Pássabe, tanba la kumpri kontratu no fornese materiál tarde, parte EJS ho PNDS rasik halo konfirmasaun maibé laiha kooperasaun, entaun ita deside hapara, loke fali foun kompañia seluk atu kontinua,” nia katak.
Notísia relevante: PNDS RAEOA submete ona lista benefisiáriu UKL faze daruak
Tuir nia, programa ne’e la hein tenke kontinua la’o, hanesan akontese tinan kotuk, balu la’o tarde entaun difikulta programa implementasaun iha 2023 ne’e.
Maibé ida-ne’e hala’o mós bazea termu kontratu, ne’ebé iha outubru nia laran uma balu laiha mudánsa ba progresu, EJS hamutuk ho PNDS rejionál sei bolu atensaun ba fornesedór sira.
“Foin daudaun ami hala’o fiskalizasaun iha sub-rejiaun sira, tarde liu mak iha Nítibe suku Lela-Ufe, no iha Pássabe progresu laiha mudánsa, agora progresu totál ba programa UNP regulár ne’e iha Oé-Cusse atinje ona 86,90%, maibé loloos tenki finaliza iha outubru ne’e,” nia informa.
Nia esplika, pursentu ne’e projetu balu kuaze taka ona kalén hela instalasaun servisu kaman sira inklui fasilidade, tanba projetu sira-ne’e hahú ezekuta iha fulan Agostu kontratu ba fulan tolu, tenki remata iha fulan outubru ne’e.
“Maibé to’o outubru ne’e foin inaugura ona suku neen, hanesan iha sub-rejiaun Oésilo iha suku Bobometo, sub-rejiaun Nítibe iha suku Suni-Ufe no Bene-Ufe, Pante Makasar suku tolu, Lalisuk, Naimeko no Lifau,” nia tenik.
Notísia relevante: MAE-RAEOA selebra MoU reforsa implementasaun PNDS Oé-Cusse
Jornalista: Abílio Elo Nini
Editór: Evaristo Soares Martins
