DILI, 05 outubru 2023 (TATOLI – Prezidente Autoridade RAEOA, Arsénio Paixão Bano, infroma, funsionamentu rezidénsia Fulolo, ne’ebé autoridade konstrui dezde 2017 hodi fó aluga, daudaun ne’e rekolla ona reseita hamutuk rihun $600 kompara ho nia despeza bakonstrusaun millaun $2-resin.
“Investimentu ba rezidensia Fulolo, millaun $2-resin, halo lutu no infrestrutura no halo estrada no elétrika, halo mós uma, osan tama fali ne’e $600,000.00 ona, hosi aluga osan ne’e tenke tama fali, aban bainrua ema ruma hakarak halo, abitasaun (perumahan) sosiál ba komunidade,” Arsénio Bano, ko’alia sai asuntu ne’e iha entrevista eskluziva iha estúdiu Agéncia Tatoli Farol, Dili, kuarta ne’e.
Notísia relevante: Hahú hosi 2015-2023, RAEOA rekolla reseita millaun $46-resin
Investimentu ida-ne’e Autoridade RAEOA konstrui liuhosi hosi Fundu Espesiál Dezenvolvimentu (FED), nu’udar fatin ba membru autoridade hodi aluga la’ós hela ho gratuita.
“Rezidénsia ne’e la’ós ba prezidente no membru autoridade sira atu hela gratis, ne’e diferente ita hela iha-ne’ebá, ho opsaun sosa ka aluga, hanesan ha’u hili opsaun aluga, ha’u hanesan Prezidente simu osan ba alojamentu nian, ne’e osan Estadu nian, sei osan osan Estadu ba alojamentu nian, di’akliu ha’u fó fali ba Estadu,” nia katak.
“Kona-bá sasán no fasilidade tenke lori rasik, maibé iha Oé-Cusse, ha’u iha uma, maibé ha’u hanoin osan ne’e Estadu nian, di’akliu fó fila ba Estadu, tan ne’e nia diferénsa ho rezidénsia ofisiál sira iha Dili ne’e ita ba hela la selu, ba rai ne’e, rai Estadu, tanba iha programa ida katak, osan ne’e tenke tama fali ba Estadu,” nia afirma.
“Tanba balu hateten, rai ne’e komunidade nian, maibé ha’u ema Oé-Cusse hela iha-ne’ebá, moris boot iha-ne’ebá, ha’u fiar rai ne’e Estadu nian, maibé ema ruma hateten, rai ne’e privada ninian, nia bele lori kazu ne’e ba tribunál, nia bele aprezenta keixa, tinan hira ona, ema ida seidauk aprezenta keixa, ita halo politizasaun de’it,” nia hateten.
Nia informa, sé komunidade la aseita nia bele halo reklamasaun, tanba ne’e maka iha Oé-Cusse ne’e, tuir lei títulu ba rai, tenke públika ba publiku, atu ema bele halo reklamasaun lori ba tribunál.
“Hanesan ha’u aluga to’o dezembru 2023 ne’e, sé ema ruma troka ha’u, hakarak uza fali fatin ne’e, laiha problema, ha’u bele sai maibé osan ne’e bele entrega fali mai ha’u, tanba ha’u selu ona ba fulan tolu nian tanba ne’e programa Governu nian,” nia katak.
Hanesan uma Estadu balu sosa ona, kuandu lakohi fali bele selu ka multa, ne’e laiha problema, ne’e desizaun autoridade hili la’ós hela gratituita de’it iha rai Estadu ho uma Estadu, di’akliu ita selu.
“Investimentu ne’e komu mai hosi osan FED, osan ne’e tama fali, karik autoridade foun mai bele uza fali osan ne’e halo rezidénsia foun ba populasaun bele aluga ou bele sosa, tanba ita tenke hatama fali osan” nia katak.
Tanba Estadu fó osan ba kargu xefia, hanesan polítiku sira, hetan osan alojamentu, deputadu, ministru, prezidente hotu-hotu hetan, osan ne’e sei iha rezidénsia iha inisiativa halo ne’e hanesan Oé-Cusse ne’e, osan ne’e tenke fila-fali ba Estadu.
“Tan ne’e maka iha Oé-Cusse, ha’u ema Oé-Cusse iha uma, maibé ha’u la hela iha uma, tenke ba hela iha rezidénsia, ne’e hanesan responsabilidade moral, di’akliu osan ne’e tenki fila-fali ba Estadu,” nia hateten.
Notísia relevante: Durante Arsénio Bano nia mandatu, RAEOA rekolla reseita millaun $9
Jornalista: Abílio Elo Nini
Editór: Evaristo Soares Martins
