DILI, 05 outubru 2023 (TATOLI)—Prezidente Komisaun E trata asuntu Infraestrutura iha Parlamentu Nasionál (PN), Deputadu Marcos Xavier, husu Governu liuhosi Ministériu Transporte no Komunikasaun (MTK) atu tun ba terrenu hodi identifika kauza motorista mikrolete sira iha kapitál Dili halo greve hodi lakohi tula pasajeiru sira.
Notísia Relevante: Asaun greve mikrolete difikulta estudante sira ba eskola
“Ezijénsia motorista hosi mikrolete nian halo greve, Ministériu Transporte no Komunikasaun (MTK) tenke haree loloos tarefa ba mikrolete sira halai iha Dili laran. Pasajeiru sira tenke selu hira, tanba mina kada loron folin sa’e hela de’it,” Prezidente Komisaun ne’e hateten ba jornalista sira iha uma fukum PN, kinta ne’e.
Nia dehan, kombustível folin sa’e la’ós kauza iha Timor-Leste de’it maibé problema mundiál tanba funu entre Ukránia ho Russia nia impaktu mai to’o Timor-Leste.
Ministru Transporte no Komunikasaun (MTK), Miguel Manetelo, nia-parte sei buka informasaun uluk ba Dirasaun Nasionál Transporte Terrestre (DNTT) hodi bele fasilita dadus ruma liga ho tarifáriu ba paajeiru sira.
Nia hateten, informasaun detallu kona-ba motorist mikrolete sira halo greve, nia-parte seidauk hetan hosi dirasaun kompetente, maibé bazeia ba informasaun hosi mídia katak motorista sira halo greve tanba kombustível folin sa’e no seluk mak pasajeiru sira selu la tuir tarrifa.
“Maibé kona-ba mina folin sa’e, ha’u lakohi fó komentariu, maibé atu hateten deit kona-ba, tarifariu ba pasajeiru sira karik, selu la tuir tarrifa ne’ebé iha mak tenta husu hela informasaun ba DNTT atu fornese informasaun,” nia dehan.
Governu sei haree tarifáriu ne’ebé própriu ba pasajeiru sira maibé tenke halo análiza oioin hodi bele hetan kustu ida-ne’ebé mak loos, maibé atu hasai análiza ida loos mak tenke iha dadus uluk hosi DNTT.
Jornalista : Nelson de Sousa
Editór : Cancio Ximenes
