DILI, 04 outubru 2023 (TATOLI) – Asaun greve husi transporte públiku hanesan Mikrolete diresaun Tasi-tolu no Bidau Lecidere ho númeru 10 difikulta estudante sira ba iha estabelesimentu ensinu sira hodi tuir atividade ensinu-aprendizajen.
“Ha’u hein hela karreta atu ba eskola, mas la iha entaun ha’u labele ba. Dalaruma iha loron tolu ne’e ha’u labele ba eskola,” estudante Universidade Díli, Imelda da Costa, hateten iha Tasi Tolu.
Iha sorin seluk, estudante São Pedro Comoro, hateten, nia la’o de’it ba eskola maibé distánsia husi uma ba eskola dook nune’e halo nia atrazu.
“Ami to’o atrazu iha eskola profesór sira hirus ami. Dalaruma fó ami sansaun ba ami atu selu,” estudante ne’e haktuir.
Estudante ne’e dehan, hakarak fila ka sai husi eskola ho bemo, tanba kolen, maibé tenki la’o ain tanba transporte la halai ka movimenta.
Nune’e mós, Zacarias Gomes, estudante Universidade Nacional Timor Lorosa’e (UNTL), dehan, mós labele ba eskola, tanba mikrolete númeru 10 ne’ebé sirkula entre Tasi-tolu no Bidau iha asaun greve.
“Fo impaktu ba ami. Ha’u mai hamriik iha ne’e atu ba eskola, maibé bemo kosong 10 la halai,” nia konklui.
Notísia relevante:Mikrolete diresaun Tasi-tolu no Bidau Lecidere sei greve to’o sesta
Jornalista: Jesuína Xavier
Editór: Rafael Ximenes de A. Belo
