DILI, 05 outubru 2023 (TATOLI) – Transporte públiku númeru 10 diresaun entre Tasi Tolu no Bidau Lecidere hala’o greve durante loron tolu, hahú ohin to’o sexta no sei retoma atividade iha sábadu.
Motoristas mikrolete númeru 10 halao asaun greve iha Tasi Tolu, tanba kauza folin gazolina sa’e husi presu dólar amerikanu 1.10 ba 1.30 iha postu kombustível sira.
Notísia relevante: https://www.globalpetrolprices.com/gasoline_prices/
“Ami halo greve tanba folin mina sa’e, nune’e mós pasajeiru sira selu tarifa lá los. Na realidade, funsionáriu no estudante dalaruma selu hanesan deit”, motorista Apaku Pereira lamenta, iha Tasi Tolu.
Nia esplika tarifa ne’ebé iha, funsionáriu sira selu kuarter no estudante sira sentavus 15.
Tanba ne’e, tuir motorista ne’e sei la sufisiente atu entrega setoran ka rezultadu operasaun ba iha patraun sira tanba pasajeiru selu la loos. “Ami tenki hatama mínimu dolar 20 ba patraun”.
Iha fatin hanesan, Motorista Adrianu Martins husu ba pasajeiru sira atu respeita tarifa ne’ebé Diresaun Nasionál Transporte no Terrestre estabelese ona. “Estudantes sira tenki selu sentavus 15 no pasajeirus sira ne’ebé la’ós estudantes tenki selu kuarter,” nia afirma.
Nune’e mós, Júlio Pereira hanesan taxista hateten, aumenta presu tarifa pasajeiru, tamba presu gazolina iha postu kombustível sira aumenta.
“Ami aumenta kada distánsia ho 50 sen, mas depende hanesan ezemplu husi Colmera ba Audian. Se ami husu presu tarifa hanesan uluk, ami lakon bo’ot,” taxista ne’e kompara iha Colmera.
Notísia relevante:Mina folin sa’e, mikrolete lahalo movimentu
Jornalista: Jesuína Xavier
Editór: Rafael Ximenes de A. Belo
