DILI, 05 outubru 2023 (TATOLI)—Xefe Gabinete Sekretaria Estadu Formasaun Profisionál no Empregu (SEFOPE), Jacinto Ribeiro Dias, informa, mate-isin traballadór timor-oan, Francisco da Costa Gonçalves, sei to’o iha Dili, Timor-Leste iha domingu (08/10).
“Kinta ne’e mate-isin sai ona hosi Koreia no domingu mak to’o iha Timor. Daudaun ami seidauk hatene traballadór ne’e mate tanba sá, tanba atu fó sai rezultadu investigasaun ba traballadór ne’e kompeténsia Polísia Koreia Súl, maibé bainhira mate-isin to’o iha Timor iha mós dokumentu ida ligadu ho rezultadu investigasaun, ita-nia traballadór ne’e foin serbisu fulan-hitu,” Xefe Gabinete hateten iha edifísiu SEFOPE Caicoli, kinta ne’e.
Notísia relevante : Komunidade hakoi mate-isin iha semitériu Because to’o novembru 2023
Iha sorin seluk, iha loron 04 outubru, Embaixadór Timor-Leste iha Koreia do Súl, Gregório de Sousa, akompaña hosi Segundu Sekretáriu, Almerio Vieira, Adidu Traballu, Calisto Pacheco, no Asistente Adidu Traballu, João da Costa Martins, ba haree matebian Francisco da Costa Gonçalves nia isin, iha mortuária Soon Ching Hyang University Hospital, Itaewon, Seul.
Antes ne’e, Embaixada hala’o ona koordenasaun ho SEFOPE hodi lori traballadór ninia mate-isin mai Timor-Leste, nune’e bainhira to’o iha Aeroportu internasionál Prezidente Nicolau Lobato, Comoro, mak sei entrega ba família.
“Embaixadór RDTL ho funsionáriu iha Seul, hato’o sentida kondolénsia ba família matebian Francisco da Costa Gonçalves, iha Timor-Leste nomós ba kolega traballadór sira iha Koreia,” refere nota ne’ebé Agência Tatoli asesu.
Francisco da Costa Gonçalves hakotu-iis iha loron 17 setembru 2023, iha sidade Gochang, Koreia Súl. Traballadór timor-oan ne’e moris iha loron 14 marsu 1989, hosi suku Lissa, postu administrativu Maubara, munisípiu Liquiçá.
Jornalista : Antónia Gusmão
Editora : Julia Chatarina
