DILI, 28 setembru 2023 (TATOLI)—Sekretáriu Estadu Toponímia no Organizasaun Urbana (SEATOU), Germano Santa Brites Dias, hateten komunidade iha kapitál Dili sei bele hakoi mate-isin iha semitériu públiku Becuse to’o fulan-novembru tinan 2023.
Notísia Relevante: Muda semitériu Becuse ba Metinaro sei hein desizaun hosi Governu
“Sei bele to’o fulan-novembru nia-laran maibé kuandu nakonu ona mak Governu deside no hakoi fali iha semitériu públiku Metinaro. Maibé, sei augenta hela no bele hakoi,” nia hateten ba Agência Tatoli hafoin halo inspesaun ba animál no sobu baraka iha aldeia Nuu-Badak, suku Akadiruhun, postu administrativu Nain Feto, munisípiu Dili, kinta ne’e.
Nia hateten, observa ona no semitériu públiku Metinaro ne’e preparadu ona atu haloot mate-isin bainhira semitériu públiku becuse iha Dili ne’e nakonu ona.
“Iha fulan-agostu ne’e, ha’u ba haree ona semitériu públiku Metinaro no preparasaun ne’e provizóriu de’it atu rede no krúz boot iha ne’ebá, nune’e atende mate hosi Dili bainhira Becuse nakonu,” nia dehan.
Semitériu Públiku Metinaro ne’ebé antes ne’e Governu utiliza hodi hakoi ema-ne’ebé mate ho COVID-19 iha 2020, Governu liuhosi Ministériu Administrasaun Estatál (MAE) planeia ona atu utiliza semitériu refere sai hanesan semitériu públiku ida hodi troka semitériu públiku Becuse ne’ebé atu nakonu ona ne’e.
Semitériu públiku iha Metinaro ne’e, Autoridade Munisipiu Dili (MD) prevee kuaze rihun $20 hodi fasilita IGEADE, I.P nia servisu iha terrenu halo moru.
Jornalista : Osória Marques
Editór : Cancio Ximenes
