Governu planeia rekruta membru PNTL-UPF foun 100 iha 2024

COVALIMA, 06 outubru 2023 (TATOLI)–Ministru Interiór (MI), Francisco da Costa Guterres, hateten tuir planu iha tinan 2024 ne’e Governu liuhosi Ministériu Interiór sei halo rekrutamentu ba membru PNTL-UPF na’in-100, atu nune’e bele reforsa servisu PNTL-UPF iha fronteira.

Notísia Relevante: Governu aseita halo rekrutamentu ba ajente no ofisiál PNTL 500

“Haree ba realidade ne’e, postu PNTL-UPF iha kada fronteira ne’e, iha membru na’in-tolu (3) de’it. Bainhira na’in-tolu ne’e moras hotu ne’e, ema laiha atu substitui. Tanba ne’e, Governu iha planu atu rekruta membru PNTL-UPF foun iha tinan oin,” Ministru Francisco da Costa Guterres hateten ba jornalista sira hafoin halo observasaun direta ba iha postu UPF Lenkede, postu administrativu Tilomar, sesta ne’e.

Kestaun ne’e ministru hato’o hafoin hala’o observasaun ba postu PNTL-UPF ne’ebé akompañadu hosi Komandante Jerál PNTL, Henrique da Costa, hodi observa direta kondisaun postu Polísia Nasionál Timor-Leste iha Unidade Patrullamentu Fronteira (PNTL-UPF) iha postu Tilomar no Fatumea, Covalima.

“Ha’u-nia vizita, mai atu enkoraja sira Governu iha atensaun ba UPF sira no husu sira atu servisu nafatin. Tanba, sira hela iha fatin área remota no laiha televizaun atu asesu informasaun no haree sira-nia kondisaun iha fronteira,” nia dehan.

Governu ezije Polísia Nasionál Timor-Leste iha Unidade Patrullamentu Fronteira (UPF) atu servisu ho di’ak, maibé Estadu no Governu mós iha obrigasaun atu tau kondisaun ba sira no kondisaun saida atu tau UPF iha postu sira iha fronteira.

Iha observasaun ne’e nota katak kondisaun postu UPF iha fronteira ne’e hasoru difikuldade sira hanesan la asesu bee-moos, eletrisidade, toba fatin ladi’ak nune’e toba de’it iha rai rede internete mós ladi’ak ne’ebé labele fasilita sira hala’o servisu ho responsabilidade no ho domin.

“Ami fila. hodi halo pakote ida atu kria kondisaun ba Unidade Patrullamentu Fronteira (UPF), nune’e sente servisu ho di’ak. Bee-moos laiha ne’e bainhira ba halo patrullamentu atu tein tenke la’o dook ba kuru bee-moos no la asesu eletrisidade sunu de’it lilin hodi fó naroman,” nia dehan.

Vizita ne’e importante tanba atu haree kondisaun no presiza atu tau kondisaun ba UPF atu tau konsiderasaun no bele prevee osan iha proposta Orsamentu Jerál Estadu 2024 atu bele kria kondisaun di’ak ba PNTL-UPF iha fronteira.

“Ami buka ona, iha tinan 2024-2025, ami kontinua tau nafatin kondisaun ba sira sai di’ak. Nune’e, sira bele hala’o servisu ho di’ak,” nia hateten.

Aleinde posta fronteira laiha kondisaun, deteta mós katak menus rekursu umanu tanba ne’e tinan oin sei halo rekrutamentu ba membru foun ba PNTL-UPF, tanba agora ne’e kamandu jerál haruka servisu kontijénsia jerál ho unidade seluk mak reforsa PNTL-UPF nia servisu iha fronteira.

Durante prezensa Ministru Interiór (MI), Francisco da Costa Guterres kompanadu husi Komandante Jerál PNTL, Henrique da Costa nia prezensa, iha Munisípiu Covalima halo vizita postu fronteira sira hanesan iha postu administrativu Fatumea, Belulik Kraik, Anin Matan, Wekiki, iha postu administrativu Tilomar vizita postu fronteira Aikakar, Lenkede, Wala no Vesey.

PNTL Covalima aprezenta pontu neen ba MI-Komjer PNTL

Entretantu, Komandante PNTL Munisípiu Covalima, Superintendente Polísia Calisto Gonzaga, sesta-ne’e, aprezenta pontu neen (6) ba Ministru Interior, Francisco da Costa Guterres, no Komandante Jerál PNTL, Henrique da Costa.

“Iha aprezentasaun atu mellora servisu polísia, iha pontu neen (6) mak ha’u atu partilla informasaun mak jeógrafika, organizasaun, operasaun administrasaun, programa prióridade,  obstakulu ho dezáfiu no rekomendasaun,” Superintendente  Polísia Calisto Gonzaga   aprezenta iha salaun enkontru komandu PNTL, Covalima.

Mapeamentu munisípiu Covalima iha área kapitál Dili parte sul, fronteira Indonézia malaka ne’ebé eskudara haat mak fronteira hanesan eskuadra Tilomar, Fatumea, Fatululik, Fohorem no Maucatar eskuadra Zumalai ho Suai iha klaran.

Munisípiu Covalima iha postu administrativu hitu hanesan Tilomar, Fatumea, Fatululik Fohorem ,Maucatar,  Zumalai ho Suai iha nia suku 30, nune’e destakamentu polísia iha suku 30 ho permanente no aLdeia 148  ho luan área  kilometru kuadradu 1,229,21.

Ho nune’e, vida iha Covalima mesak agrikultó, peska, pekuária, funsionáriu públiku, PNTL, F-FDTL no balun servisu iha Organizasaun Noun Governamentál.

Organograma depende lei órganika 2022 hatuur nivél xefia iha komandu munisípiu, iha seksaun hanesan seksaun operasaun, intelijénsia, investigasaun kriminál, tránzitu seguransa rodoviária, seksaun reserve intervensaun rápida no iha seksaun pesoál formasuan no administrasaun no okos mak komandante eskuadra-sira.

Servisu iha eskuadra iha estrutura sira hanesan sub-seksaun postu no Ofisiál Polísia Suku (OPS), ho nune’e sub-seksauk ne’ebé presiza atu reforsa hanesan sekretáriadu, sentru operasaun komunikasaun, sub-seksaun inteljénsia investigasaun no tránzitu seguransa rodoviária iha kuartél ho sub iha eskuadra.

Komandu PNTL Covalima destaka postu integradu permanente tolu hanesan iha fronteita Mota Masin, Areoportu no Tribunál, postu integradu sira seluk depende nesesáriu estabelese iha suku Tashilin tanba mosu konflitu entre Grupu Arte Marsiál no agora retira ona.

Aleinde ne’e komandu PNTL Covalima, la’ós servisu mesak maibé servisu hamutuk ho parseiru sira hanesan Governu lokál lidera hosi autoridade munisipál ho nia estrutura.

PNTL Covalima servisu hamutuk ONG, Igreja, konsellu munisipál, Kombatente libertasaun Nasionál, Asosiasaun feto, juventude, asosiasaun komunitáriu suku sira, Komisaun Reguladór Arte Marsiál, F-FDTL, UPF, UPM no CCI Covalima.

“Komandu servisu hamutuk ho CCI Covalima, ita identifika dadus balun ne’ebé aprezenta ba tribunál. Ha’u hanoin medida ida-ne’e mak ami aplika la’ós iha munisípiu Covalima de’it maibé iha munisípiu hotu,” nia hateten.

Tuir dadus, membru Polísia Nasionál Timor-Leste (PNTL) iha komandu munisípiu Covalima hamutuk 148 ne’ebé destaka ba eskuadra hitu.

Jornalista : Celestina Teles

Editór       : Cancio Ximenes