Janeiru-outubru: PNTL Covalima rejista kazu insidente 68
COVALIMA, 06 outubru 2023 (TATOLI)—Komandante PNTL Covalima, Superintendente Polísia Calisto Gonzaga, hateten hahú fulan-janeiru to’o fulan-outubru ne’e Komandu PNTL Covalima rejista kazu insidente hamutuk 68.
Notísia Relevante: Governu planeia rekruta membru PNTL-UPF foun 100 iha 2024
“Hosi kazu hirak ne’e, kazu aas liu mak asaltu ofensa fízika hamutuk 36,” Komandante PNTL Covalima hateten liuhosi hato’o relatóriu ibainhira hala’o enkontru ho Ministru Interiór, Francisco da Costa Guterres ho Komandante Jerál PNTL, Henrique da Costa, iha salaun komandu PNTL Covalima, sesta ne’e.
Komandu PNTL rejista kazu insidente 68 ho tipu kazu sira hanesan asaltu Ofensa 36, violénsia doméstika (VD) 22, asaltu seksuál hamutuk ualu (8) kontra bandu ne’e mós iha ualu (8).
Nia hateten, kazu ne’ebé komandu PNTL Covalima rejista ne’e nia prosesu andamentu iha ona Ministériu Públiku (MP) Suai atu prosesa.
Aleinde ne’e, nia hateten, Komandu PNTL mós rejista tan kazu asidente ho tipu sira hanesan asidente xoke malu iha hitu (7), asidente mesak iha sia (9), inflasaun laiha karta kondusaun iha 102, mate iha 10-resin no kanek na’in-hitu (7).
Jornalista : Celestina Teles
Editór : Cancio Ximenes
