DILI, 06 outubru 2023 (TATOLI) – Estudante 60 husi eskola 20 iha Dili partisipa iha kompetisaun Espelling Bee ne’ebé organiza husi Sala Leitura Xanana Gusmão. Konkursu ne’ebé halo ho lian tetun ne’e atu hasa’e koñesimentu alunu sira tuir tetun padronizada husi Intitutu Nasionál Linguístika (INL) nian.
Objetivu husi kompetisaun ne’e atu komemora Loron Mundiál ba Literasia ne’ebé monu iha 08 setembru liubá. Tanba kestaun téknika maka Sala Leitura foin bele realiza ohin.
Spelling Bee mak kompetisaun orijinária husi Estadu Unidu Amérika ho nia objetivu mak kontribui ba mellora estudante sira iha soletra, aumenta sira-nian vokabuláriu no dezevolvimentu uzu inglés ho loos.
Jestora Sala Leitura Xanana Gusmão, Maria Amaral Guterres, hatete konkursu Espelling Bee ne’ebé maka halo ne’e la’ós kompetisaun baibain hanesan sertame ne’ebé eskola sira realiza, maibé ida ne’e adota husi nasaun Amérika nian, enkuantu Sala Leitura utiliza lian tetun ba alunu sira.
Konkursu ne’e atu reforsa literasia tetun ho loloos, ezemplu husu ba labarik sira atu forma liafuan sira hanesan ‘komunidade’ tuir tetun padronizada.
“Atividade espelling bee ne’e ita adota atu promove ita-nian lian tetun hodi fó koñesimentu ba estudante sira husi edukasaun bázika iha terseiru siklu sira oinsá atu hakerek tetun ho maneira ne’ebé loos tuir padraun INL nian”, esplika.
Haree ba atividade ida ne’e, Koordenadór Gabinete Avaliasaun Dezenvolvimentu Kurríkulu Nasionál, João Maupelu, dehan iha futuru Ministériu Edukasaun bele realiza kompetisaun refere iha sistema edukasaun Timor-Leste nian.
Tuir nia, konkursu Spelling Bee ne’ebé Sala Leitura organiza ne’e atu hatoman estudante sira oinsá bele koñese no hatene literasia tetun tuir padraun INL.
“Ministériu sei halo esforsu atu implementa iha eskola sira amezmu tempu bele kontinua realiza liuhusi atividade kompetisaun sira hodi bele hatoman estudante sira atu koñese sistema literasia tetun tuir padraun INL nian”, nia kompromete.
Kompetisaun ne’e partisipa husi alunu sira husi eskola públika no privada. Kada eskola delega nia estudante na’in-3. Atividade ne’e di’ak tebes tanba estudante sira bele ko’alia tetun, maibé bainhira atu hakerek dalen tetun sei difísil, nune’e ho atividade refere hanorin sira tetun tuir padraun.
Jornalista: Tomé Amado
Editora: Maria Auxiliadora
