MALIANA, 06 outubru 2023 (TATOLI)-Prezidente Autoridade Munisípiu Bobonaro, Ernesto de Oliveira Barreto, relata implementasaun Programa Movimentu Hafoun Aldeia (PMOHA) tinan 2022 iha suku Malilait, postu administrativu Bobonaro paradu tanba orsamentu la sufisiente.
Ernesto de Oliveira Barreto, aprezenta asuntu ne’e durante enkontru ho Sekretáriu Estadu Dezenvolvimentu Lokál, Mateus dos Santos Tallo, iha salaun administrasaun munisípál Bobonaro, sesta ne’e.
Nia dehan, pregresu implementasaun programa ne’e foin atinje 41%.
“Ita-nia programa ne’e paradu hela, tanba osan rihun $10 hotu ona, atu husu tan $10,000.00. Uluk VIII Governu la hatán be agora sei paradu hela, ne’ebé depois ida-ne’e ha’u sei haruka diretór fiskalizasaun ba haree took sasán sira-ne’e, tanba se progresu ne’e atinje 41% signifika 9% sei iha, maibé osan hotu ona,” nia informa
Programa PMOHA ne’e foka liu maka hadi’a ambiente, atividade produtivu hanesan ortikultura, pekuária no empreendedorizmu iha nível aldeia bazea ba potensialidade ne’ebé aldeia sira iha nune’e bele hadi’a populasaun sira-nia moris.
Programa refere implementa husi Ministériu Administrasaun Estatál bazea ba dekretu lei nú. 23/2021.atu aselera dezenvolvimentu komunitária hodi hakbesik dezenvolvimentu ba komunidade, no haforsa sıra-nia papél atu sai na’in no autór prinsipál hodi halo transformasaun ba área ne’ebé sira rasik identifika no prioritiza tuir sira-nia poténsia no rekursu aldeia ne’ebé sira rasik hatudu atu halo mudansa.
Antes ne’e, Programa Saemaul Undong implementa iha Timor-Leste hahú iha tinan 2016 bainhira Timor-Leste asina akordu bilaterál ho Governu Korea no hili Munisípiu Lautém mak sai hanesan pilotu ba projetu Saemaul Undong ninian.
Notísia relevante: Governu sei implementa tan PMOHA iha aldeia 12
Jornalista: Sérgio da Cruz
Editór: Evaristo Soares Martins
