PM Xanana prefere halakon fakuldade saúde iha UCT
BOBONARO, 07 outubru 2023 (TATOLI)—Primeiru-Ministru (PM), Kay Rala Xanana Gusmão, prefere jerente sira iha Universidade Katólika Timorense (UCT, sigla portugés) São João Paulo II, atu halakon fakuldade medisina no siénsia saúde.
“Fiquei decepcionado, tanba saida? tanba UNDIL, UNTL, UNPAZ sira hotu hanorin Enfermajen, Universidade Katólika ba hanorin Enfermajen? Ne’ebé la fó valór ba buat ida ne’ebé hakerek, tanba ne’e ha’u husu favór ida, Amu sira, Kardeál, Amu Bispu ida iha Baucau muda tia, Universidade Katólika Dili atu sai universidade exelente hanorin filosofia no hanorin buat sira ne’ebé di’ak hodi atu kria jerasaun ba futuru rai ida-ne’e, la’ós ba Enfermajen,” PM Xanana hateten bainhira partisipa iha serimónia ezisténsia ba dala-75 Colégio Infante de Sagres Maliana, iha aldeia Lugululi, suku Manapa, postu administrativu Cailaco, munisípiu Bobonaru, sábadu ne’e.
Xefe Governu dehan, hahú IV Governu tinan 2008, iha ona hanoin harii Universidade Katólika Exelente hodi forma líder Timor-Leste ba futuru, maibé la konsege implementa, maibé nia hakfodak Uma-Kreda Katólika konsege harii UCT iha tinan 2021.
Nia konsidera, papél igreja iha edukasaun atu forma líder ba nasaun iha futuru hodi hametin no haklaken morál ba sidadaun sira hotu.
Notísia Relevante : PM Taur espera UCT sai ensinu superiór exelente iha Timor-Leste
Tanba ne’e, Antigu Prezidente Repúblika hanoin UCT tenke foku hanorin filosofia atu nune’e bele dezempeña papél igreja ho di’ak hodi prepara jerasaun futura ba rai ida-ne’e.
PM Xanana iha esperansa ba futuru UCT sai ensin superiór exelente hodi garante kualidade edukasaun iha ensinu superiór Timor-Leste.
“Ita hotu tenke tau-matan ba kualidade mak tenke sai parímetru boot ida, se lae ita hanesan hotu de’it, agora problema kualidade ensinu, sim agora problema ne’ebé sei kleur hodi primária to’o sekundária, liu-liu iha universitáriu susar tebes, tanba ne’e mak ita komesa prepara profesór lian portugés,” nia akresenta.
Notísia Relevante: UCT ho UNTL asina akordu iha área medisina
Iha biban hanesan, Bispu Dioseze Maliana no atuál Prezidente Konferénsia Episkopál Timorense, Dom Norberto do Amarál, rekoñese ezisténsia UCT iha komplikasaun boot ida ba parte igreja.
“Hau husu bele kompreende oituan ba, tanba ida-ne’e ami sei rezolve hela, depois ami sei haree didi’ak,” Amu dehan.
UCT São João Paulo II ninia ezisténsia hahú iha loron 08 dezembru 2021, hafoin hahú kedan ho inskrisaun ba estudante sira no prosesu ba semestre pre-universidade.
Hahú loke inskrisaun iha loron 10 janeiru to’o 11 fevereiru 2022, ne’ebé iha aplikante hamutuk 2.000 resin maibé hafoin tuir prosesu selesaun bazeia ba rekezitu sira, iha ema na’in-491 mak admitidu, ne’ebé distribui ba fakuldade edukasaun, lian no arte, siénsia umana, medisina no siénsia ba saúde inklui enjenñaria agríkola.
Universidade Katólika ne’e hahú atividade akadémika tinan 2022, liuhosi prosesu aprendizajen pre-universitáriu dahuluk, ho durasaun semana 15 hodi prepara ba semestre tuir mai.
Jornalista : Sérgio da Cruz
Editora : Julia Chatarina
