APC aprosima ona vítima inséndiu Karantina hodi dezloka bá munisípiu
DILI, 10 outubru 2023 (TATOLI)— Autoridade Protesaun Sivíl (APC, sigla Portugés) hala’o ona aprosimasaun ho vítima inséndiu iha Karantina Terra Santa, Tasi-Tolu-Dili atu simu matéria konstrusaun hodi bele dezloka ba ida-idak nia-munisípiu.
Inséndiu ne’ebé kauza hosi serkuitu eletrisidade ne’ebé akontese iha kinta (23/02/23) ne’e, rezulta uma no sasán hosi xefe familia 55 ho totál abitante na’in-235 ne’e la konsege salva.
Daudaun ne’e, vítima inséndiu hirak ne’e sei okupa uma Estadu iha Lanut-Dili, iha área Bairru-Pité-Dili, tanba laiha fatin atu hela bá.
“Ita halo ona aproximasaun dala-rua ba sira (vítima). Liuhosi aprosimasaun ne’e ita buka dalan hodi sira bele ba rai moris fatin ka kontinua iha Díli, mas tenke buka rai livre husi disputa atu Governu bele fó materiál konstrusaun ruma no orsamentu oituan,” dehan Diretór Relasaun Externa no Komunikasaun APC, Anacleto Caetano, ba Agéncia TATOLI, segunda ne’e iha Caicoli.
Nia esplika maske vítima sira la hela iha uma permanente, maibé governu fó apoio liuhusi nafatin ho baze ba Dekretu-Lei númeru 7/2021, ne’ebé preve kona-ba apoiu públiku husi Estadu ba vítima asidente no katastrofes iha artigu 4, alinea e) kona-ba doasaun materiál konstrusaun hodi hadi’a uma.
Iha alinea f) artigu ida ne’e mós doasaun subsídiu hodi apoiu vítima sira atu harii uma ne’ebé estragu husi dezastres ka inséndiu.
“Governu iha rihun $39 atu fó subsídiu ba família sira husi inséndiu karatina no dadaun hela iha Lanut, maibé tenke deside sai hosi fatin ne’e,” nia afirma.
APC iha materiál konstrusaun hanesan zinku, sementu,besi ba ai-rin, pregu, martelu, kanuru no sira seluk hodi apoiu ba vitima sira, maibé vítima sira hakarak fila ba fatin anteriór.
“Nune’e, Governu seidauk fó materiál no subsídiu ba sira. Ita nia vítima sira fó razaun tanba labarik sira eskola iha Díli ne’ebé labele bá foho, maibe sei aproxima nafatin atu nune’e bele fila ba nia moris fatin ho apoio Governu nian”, nia afirma.
Vítima sira hakarak mantein iha Dili
Vítima inséndiu sira Karantina Tasi Tolu sente iha difikuldade atu sai husi fatin provisória Lanut tanba hodi ba foho ka rai moris fatin tanba servisu no oan sira eskola iha Dili.
“Ami ba foho mós di’ak, maibé oinsá ho labarik sira ne’ebé eskola no servisu ida Dili ne’e. Atu sai ba fatin seluk mós ami laiha osan atu sosa rai”, preokupa Vítima Inséndiu, Veronica de Jesus Soares.
Biban ne’e, Vítima Estela Soares, hateten nia nia parte aseita atu governu apoia hodi fila ba nia rai moris fatin iha Munisípiu Bobonaro tanba iha Dili rai no uma laiha.
“Ami simu ona despaixu atu sai iha fin fulan ida ne’e. Desizaun husi Governo ho Avo Ramos husi Palásiu Prezidente katak se mak laiha rai iha Dili tenki fila ba munisípiu. Se mak rai iha kapital bele hela. Ami sei simu material konstrusaun no osan. Ha’u deside pesoalmente atu fila ba munisípiu,” nia afirma.
Notísia relevante: Xanana Gusmão muda labarik no inan isin-rua hela iha fatin seguru
Jornalista : Jesuína Xavier
Editor : Florencio Miranda Ximenes
