iklan

MUNISÍPIU, SAÚDE, VIQUEQUE

Autoridade suku Nahareka deklara ALFA

Autoridade suku Nahareka deklara ALFA

Autoridade lokál ofisialmente deklara ALFA iha suku Nahareka, segubda (09/10/2023). Imajen Tatoli/Vitorino Lopes da Costa

VIQUEQUE, 09 outubru 2023 (TATOLI)—Autoridade suku Nahareka, postu administrativu Ossu, munisípiu Viqueque, kompostu hosi Xefe suku interinu, Nazário Fernandes no Xefe aldeia lima, segunda ne’e, ofisialmente deklara Área La So’e Fo’er Arbiru (ALFA).

Prezidente Autoridade Viqueque, Januário Soares ‘Bolly’, hateten, munisípiu Viqueque atu deklara ona ALFA iha tinan 2022 maibé seidauk konsege implementa tanba suku Uaibobo no Liaruka seidauk deklara.

“Ita hotu tenke esforsu hamutuk atu nune’e iha tinan 2024 bele deklara iha nível postu no munisípiu Viqueque. Bainhira iha faze primeiru maka sentina ho faze segundu maka ita esforsu instala tan bee atu sentina bele iha bee hodi fase liman. Tanba ne’e, ha’u sempre fó hanoin ba Programa Dezenvolvimentu Nasionál Suku (PNDS) no Xefe suku sira tenke tau planu dada bee atu abitante sira bele uza,” Autoridade munisipál dehan iha serimónia deklarasaun ALFA, iha suku Nahareka.

Notísia relevante : Komunidade suku Uabubu Viqueque deklara ALFA

Tuir Prezidente Autoridade Viqueque, bee-moos iha suku Nahareka iha ona, maibé presiza aumenta hodi abitante sira bele uza tanba bainhira sentina mak laiha bee maka sei difikulta abitante sira.

“Toilet iha ona maibé bee maka menus, nune’e faze tuir mai ita tenke esforsu hodi dada bee-moos. Ikus,  ha’u hato’o apresiasaun ba Autoridade Nahareka, abitante no pesoál saúde sira ne’ebé deklara ona ALFA. Ida-ne’e no ba oin abitante sira nafatin uza sentina sira ne’ebé maka iha ona,” nia akresenta.

Iha fatin hanesan, Diretór Servisu Saúde Viqueque, Pedro Pereira, hato’o apresiasaun ba abitante suku Nahareka ne’ebé durante tinan-lima halo esforsu nune’e agora bele deklara ALFA atu abitante sira livre hosi ambiente foer no bele moris saudável.

“Foin lalais setembru 2023 ita aprezenta ona dignóstika partisipativu, nune’ebé hatudu katak uma-kain 79 maka laiha toilet, maibé abitante sira bele rezolve lalais. Tanba ne’e, ha’u husu ba Administradór postu tanba liuhosi programa Mão de Obra bele kria posu toilet ba abitante sira-ne’ebé laiha kbiit atu halo toilet, ida-ne’e bele apoia tebes ba serbisu saúde nian,” nia hato’o.

Bainhira abitante sira soe foer abiru, maka ninia impaktu ba fali saúde, tanba ne’e tenke uza nafatin sentina sira-ne’ebé iha ona.

Nune’e mós, Xefe suku Nahareka, Nazário Fernandes, hateten, programa ALFA tama suku ne’e iha tinan 2018, maibé tinan 2023 foin deklara ALFA tanba hetan apoia pesoál saúde sira iha postu Ossu ne’ebé konsege konvense no motiva abitante sira hodi kria sentina hodi uza ambiente moos hodi proteje moras sira-ne’ebé fó impaktu hosi ambiente.

“Suku Nahareka deklara ona ALFA iha tinan ida-ne’e. Tuir loloos ne’e ami deklara antes ona maibé kondisaun maka la permite, nune’e agora foin deklara. Ami agradese ba pesoál saúde sira ne’ebé halo esforsu tama sai komunidade nia uma hodi fó hanoin ba abitante sira kria toilet,” nia hato’o.

Tuir dadus, suku Nahareka kompostu hosi aldeia lima ho totál abitante 1.325, totál uma 368 no uma-kain 444 maka iha hotu ona toilet.

Serimónia ne’e hetan partisipasaun hosi Komandante Polísia Nasionál Timor-Leste (PNTL) Eskuadra Ossu, Diretór PNDS Viqueque, Pesoál Saúde Ossu inklui abitante sira iha suku Nahareka.

Jornalista     : Vitorino Lopes da Costa

Editora          : Julia Chatarina

iklan
iklan

Leave a Reply

iklan
error: Content is protected !!