iklan

MUNISÍPIU, VIQUEQUE

CEFTEC kapasita funsionáriu Viqueque kona-ba relasaun públika no serbisu protokolu

CEFTEC kapasita funsionáriu Viqueque kona-ba relasaun públika no serbisu protokolu

Formandu sira hasai foto hamutuk ho Koordenadór CEFTEC, Rafael da Silva Freitas, Xefe Gabinete SEKOMS, Elizeu Isac Fernandes no Prezidente Autoridade munisípiu Viqueque, Januário Soares ‘Bolly’, iha ámbitu abertura formasaun, iha salaun Administrasaun Viqueque, segunda (09/10/2023). Imajen Tatoli/Vitorino Lopes da Costa

VIQUEQUE, 09 outubru 2023 (TATOLI)–Sekretaria Estadu Komunikasaun Sosiál (SEKOMS) liuhosi Sentru Formasaun Téknika no Komunikasaun (CEFTEC, sigla portugés) oferese formasaun ba funsionáriu sira iha munisípiu Viqueque kona-ba relasaun públika no serbisu protokolu.

Koordenadór CEFTEC, Rafael da Silva Freitas, hateten, Sentru Formasaun ne’e ninia knaar mak fó formasaun ba funsionáriu sira atu hasa’e koñesimentu.

“Ami implementa uluk formasaun iha nível hanesan iha Ataúro no agora kontinua iha munisípiu Viqueque iha área relasaun públika no protokolu, durante loron-lima. Formandu sira tenke iha konsiénsia hodi apreende,” Koordenadór Sentru Formasaun dehan iha abertura formasaun, iha salaun Administrasaun Viqueque, segunda ne’e.

Notísia relevante : MAPKOMS husu formandu 192 atu aproveita di’ak formasaun iha CEFTEC

Matéria formasaun maka hanesan tékniku komunikasaun relasaun públika, diskursu públiku, téknika aprezenta iha serimónia no tékniku implementasaun serbisu protokolu.

Formasaun hahú segunda to’o sesta, ne’ebé partisipa hosi formandu hamutuk na’in-20, hosi funsionáriu administrasaun, postu no sentru informasaun rua iha munisípiu Viqueque.

Xefe Gabinete SEKOMS, Elizeu Isac Fernandes, hateten, IX Governu liuhosi SEKOMS estabelese CEFTEC hodi kria formasaun. Tanba ne’e, agora implementa formasaun hahú hosi Viqueque no sei kontinua iha Aileu, Ainaro no Covalima.

“Tanba ne’e, ha’u husu ba formandu sira iha Viqueque atu atensaun ba formasaun sira ne’e, la’ós tanba imi menus koñesimentu ba relasaun públika no protokolu, maibé ita hotu hatene katak apreende ne’e tenke apreende beibeik hodi hasa’e koñesimentu ba área sira-ne’e,” Elizeu hameno.

Biban ne’e, nia husu formandu sira atu aproveita formasaun ne’e hodi fó benefísiu ba administrasaun munisípiu Viqueque, postu adiministrativu no diresaun sira iha Viqueque.

“Ha’u husu ba formandu sira labele tauk iha prosesu formasaun nia laran, karik la komprieende tenke husu barak atu imi bele hatene. Formasaun ne’e hotu CEFTEC sei haree hodi kontinuasaun programa sira,” nia hato’o.

Iha fatin hanesan, Prezidente Autoridade munisípiu Viqueque, Januário Soares ‘Bolly’, agradese ba SEKOMS ne’ebé oferese formasaun iha munisípiu Viqueque.

“Ha’u agradese ba SEKOMS ne’ebé tau ona priodade ba Viqueque hodi kria formasaun ida-ne’e. Tanba ne’e, ha’u husu ba formandu sira tenke atensaun hodi bele kompreende matéria hosi formadór sira hodi implementa iha Viqueque,” nia tenik.

Jornalista     : Vitorino Lopes da Costa

Editora          : Julia Chatarina

iklan
iklan

Leave a Reply

iklan
error: Content is protected !!