DILI, 09 outubru 2023 (TATOLI)—Autoridade Nasionál Mineiru, Institutu Públiku (ANM, I.P) halo pra-kualifikasaun ona empreza hamutuk sia maioria empreza internasionál, ne’ebé iha ona interese hodi konkorre ba konkursu públiku hodi halo estudu ba explorasaun rekursu metáliku hamutuk bloku 49 iha territóriu Timor-Leste.
“Governu lansa konkursu ida bolu ‘mineral tenders’ iha loron 20 marsu 2023, ne’ebé hanesan loke oportunidade ida ba empreza internasionál no lokál ne’ebé mak iha interese hakarak halo investimentu iha área mineiru nian ne’e bele partisipa, entaun ne’e loke ba tipu minerál ida bolu metáliku. Durante prosesu, fahe ba prosesu pra-kualifikasaun no kualifikasaun, ne’ebé iha etapa pra-kualifikasaun ne’e ita identifika empreza ne’ebé hatudu interese hamutuk 14, hosi prosesu ne’ebé rigorozu tebes iha etapa dahuluk ita submisaun dokumentu iha pra-kualifikasaun nian, ita konsege pra-kualifika empreza sia mak iha interese,” Prezidente ANM, Rafael Danilson de Araújo, informa, iha serimónia enserramentu konkursu públiku, iha City 8, Has-laran, segunda ne’e.
Nia haktuir, iha prosesu ne’e hotu, ANM rejista empreza lubuk ida hosi nasaun Indonézia, Xina, Índia, Austrália no Singapura.
“Ekipa evaluadór sei halo evaluasaun ba dokumentu sira ne’e hotu ho durasaun fulan-rua, bainhira termina ona sei notifika manán-na’in no kuandu loos ona maka iha tinan ne’e sei asina kontratu ho empreza sira ne’e hodi sira bele realiza ona prospesaun peskiza,” nia akresenta.
Notísia relevante : Aprova ona abertura área realizasaun atividade mineira no termu referénsia konkursu nian
Bloku 49 ne’e loke iha Timor laran tomak to’o Rejiaun Administrativa Espesiál Oé-cusse-Ambeno inklui Illa Ataúro, ne’ebé posibilidade prospesaun no peskiza ne’e bele akontese iha ne’ebá.
Durasaun peskiza depende ba proposta ne’ebé empreza sira submete, balun to’o tinan-ida, balun to’o tinan-lima. Kuandu rezultadu peskiza di’ak bele loke ona investimentu.
Jornalista : Antónia Gusmão
Editora : Julia Chatarina
