Top

Komisaun F husu Governu fó atendimentu dignu ba ema defisiénsia mentál

Ema ho defisiénsia mentál hosi suku Ritabou ho naran koñesida ‘Nando Pinki’ movimenta ba-mai iha luron públiku ho isin-molik. Imajen Tatoli/Sérgio da Cruz.

DILI, 09 outubru 2023 (TATOLI)—Deputada membru komisaun F trata asuntu Saúde iha Parlamentu Nasionál (PN), Teresa Gusmão, husu Governu liuhosi Ministériu Saúde (MS) atu fó atendimentu dignu ba ema ho defisiénsia mentál.

Notísia Relevante: Deputadu opozisaun husu Governu kria kondisaun asegura ema ho defisiénsia mentál

Deputada membru komisaun ne’e hato’o liuhosi entrevista ho Agência Tatoli relasiona ho loron Mundiál Saúde Mentál ka World Mental Health Day (WMHD) ne’ebé mundu tomak inklui Timor-Leste selebra iha kada 10 outubru.

“Hanoin kona-ba ita-nia maluk sira-ne’ebé ho defisiensia mentál, moras ida-ne’e ema hotu-hotu ninia natureza hakarak moris normal. Maibé enkuantu ita-nia maluk sira mosu situasaun ne’e ba sira, ita mós hanoin sira moris loro-loron. Ita mós fó korajen ba sira liuhosi Governu nia atendimentu liuliu Ministériu Saúde atu fó tratamentu dignu ba sira maske sira ho defisiénsia mentál,” Deputada Teresa Gusmão hateten iha uma fukun PN, segunda ne’e.

Ministériu Saúde (MS) estabelese ona klínika saúde mentál iha Hospitál Nasionál Guido Valedares (HNGV), no komisaun F hala’o ona fiskalizasaun hodi haree direta fatin ne’e kiik-liu no ladun seguru no médiku espesialista saúde mentál foin ema na’in-ida ka rua tanba iha tékniku sei menus.

“Ami ba haree ona presiza Governu liuhosi Ministériu Saúde tau matan halo fali infraestrutura ida adekuadu seguru ba maluk defisiénsia mentál no médiku, alainde tau seguransa atu tau matan,” nia hateten

Nia hateten, iha mós klínika saúde mentál iha Laklubar maibé fatin la sufisiente atu akumula ema ho defisiénsia mentál, tanba ohin loron mós haree sidadaun ho defisiensia mentál barak mak iha luron, loloos Governu tenke trata sira ho dignu.

“Enkoraja sira no oinsá atu fó tratamentu dignu.  Espera IX Governu ne’e, ba oin, kria kondisaun dignu liután,” Depuatda hosi bankada PD ne’e hateten.

Tema Loron Munsiál Saúde Mentál 2023

Loron Munsiál Saúde Mentál 2023 ho tema “Mental Health is a Universal Human Right” ka tradús b aba dalen tetun sai “Saúde Mentál Nu’udar Direitu Umanu Universál”.

Hanesan hakerek ona iha portal World Federation of Mental Health (WFMH), tema ida-ne’e iha korelasaun ho WFMH nia prinsipiu hahú iha 1948 liubá ne’e. Kampaña komemorasaun ba loron Loron Mundiál Saúde Mentál iha 2023 ne’e, hakarak halo saúde mentál sai hanesan direitu umanu ida.

Ho nune’e, aspirasaun hasoru saúde mentál ne’ebé saudável ne’e presiza hanesan direitu bázika ne’ebé fó ba ema kada ema ida iha ninia moris tomak, atu sai hanesan parte ida hodi atinje no kuidadu saúde mental ema hotu-hotu iha mundu.

Istória Loron Mundiál Saúde Mentál

Loron Mundiál Saúde Mentál komemora kada loron 10 outubru.  Istória komemorasaun ne’e hahú iha tinan 1992, iha tempu ne’eba RICHARD HUNTER hanesan Vise Sekretáriu Jerál World Federation of Mental Health (WFMH) mak funda.

Iha komemorasaun ba dahuluk ne’e, 10 outubru 1992, ne’e hahú lahó tema. Maibé, iha opiniaun balun mosu katak importante mak habelar dadvokasia hasoru saúde mentál em jerál. Aleinde ne’e, komemorasaun ne’e ho objetivu atu eduka komunidade mjundiál atu fó atensaun ba problema saúde ema ho defisiénsia mentál.

Jornalista : Nelson de Sousa

Editór         : Cancio Ximenes

Publisidade

Leave a Reply

Latest Post

error: Content is protected !!