PAM Bobonaro husu ofisiál supervizaun na’in-164 serbisu ho profisionál
MALIANA, 09 outubru 2023 (TATOLI)-Komisaun Nasionál Eleisaun (CNE, sigla portugés) Munisípiu Bobonaro, segunda ne’e fó formasaun loron rua ba Ofisiál Supervizaun Eleitorál na’in-164 hodi prepara ba eleisaun suku ne’ebé sei realiza iha loron 28 fulan ne’e.
Objetivu hosi formasaun ne’e atu kapasidade OSE sira kona-ba sistema eleisaun suku, papél OSE, krime eleitorál no prienximentu kestionáriu hahú prosesu simu kandidatura, eleisaun to’o kontajen votu no karik mosu eleisaun segunda volta.
Prezidente Autoridade Munisípiu Bobonaro, Ernesto de Oliveira Barreto, hateten Ofisiál Supervizaun Eleitorál nia papél importante tebes atu superviziona lala’ok eleisaun suku tomak hahú hosi prosesu to’o remata.
Nia apela ba OSE sira atu servisu ho profisionál no responsabilidade tuir lei no lema CNE nian katak, imparsiál, independente no tranparánsia hodi fó susesu ba eleisaun suku tinan ne’e.
Notísia relevante: CNE Bobonaro fó teste ba Ofisiál Supervizaun Eleitorál
“Ida-ne’ebé mak imi atu ba hasoru ne’e, la hatene lei, ne’e mak problema ba ita, entaun ita-boot sira tenke uza métodu ida-ne’ebé maka di’ak atubele konvense sira, buat ida kontradisaun ideia, balu dalaruma hanesan ne’e, ida-ne’e mai hosi partidu ida ne’e, nia atu mai disturbiu ha’u-nia kandidatu, maibé ita-boot sira ema tékniku, ita-boot sira ko’alia kona-bá lei, agora ida mai ne’e mesmu nia sala hela mós dehan nia loos, entaun ita-boot sira tenke uza métodu ne’ebé di’ak,” nia fó hanoin.
Diretór CNE Munisípiu Bobonaro, Juvito Ramos, esplika, ofisiál supervizaun hirak-ne’e na’in 193 sei koloka ba ka sentru votasaun no nain ida sei apoia eskritóriu.
“Sira-nia papél superviziona ba prosesu edukasaun votante, ekontrontu extraordinariu hodi propoin membru asembleia suku no aldeia, tau-matan mós aprezentasaun kandidatura ba xefe suku ne’ebé mak sei akontese iha loron 13, no mós kandidatu xefe aldeia no delegadu ho delegada, tau matan ba prosesu eleisaun, kontajen votu, karik akontese eleisaun segunda volta,” nia hateten.
Diretór STAE Munisípiu Bobonaro, Mariano Viegas Amarál, subliña iha eleisaun suku tinan ne’e estadu fó fiarak tomak ba OSE sira atu servisu hamutuk ho pesoál STAE Apoia Suku (PSAS) no Pesoál STAE Apoia Aldeia (PSAA).
“Ita-boot sira tenke tau matan di’diak, hahú hosi prosesu aprezentasaun kandidatu, lala’ok ne’ebé maka meza asembleia suku, kuandu lakohi halo tuir regra, tenke fó atensaun ba sira, labele fó leet, tenke tuir de’it lei, labele halo tuir sira-nia hakarak,” nia fó hanoin ba ofisiál supervizaun sira.
Enkuantu sentru votasaun eleisaun suku tinan ne’e iha munisípiu Bobonaro hamutuk 193, kobre aldeia 193, suku 50, postu administrativu neen.
Notísia relevante: STAE Bobonaro presiza karreta 65 apoia eleisaun suku
Jornalista : Sérgio da Cruz
Editór : Evaristo Soares Martins
