MALIANA,12 setembru 2023 (TATOLI)-Komisaun Nasionál Eleisaun (CNE, sigla Portugués) munisípiu Bobonaro, tersa ne’e, fó teste eskrita ba kandidatu Ofisiál Supervizaun Eleitorál (OSE) hamutuk na’in 255 ne’ebé maka sei destaka bá postu administrativu Atabae, Balibo, Cailaco, Maliana, Bobonaro no Loloto’e hodi halo supervizaun ba prosesu eleisaun suku iha fulan-outubru 2023.
Diretór CNE munisípiu Bobonaro, Juvito Ramos, hateten matéria teste eskrita ne’e foka liuliu kona-ba lala’ok eleisaun suku nian.
“Sira ne’e hamutuk 255 mak tuir teste karik pasa sei sai supervizór ba iha eleisaun suku iha kada aldeia,”Nia hateten ba Jornalista sira iha Gináziu Maliana.
Tuir nia kandidatu hirak ne’e sei tuir tan teste iha faze tuirmai bainhira pasa iha teste eskrita ohin nian.
Prosesu selesaun dokumentu hosi kandidatu Ofisiál Supervizaun Eleitorál sira-nian ne’e la’ós haree ba esperénsia servisu maibé sei haree hosi rezultadu teste sira-nian atinje duni valór ne’ebé maka CNE fó ka lae?.
“Ami la bazeia ba sira ne’ebé iha ona sertifikadu CNE uluk sai hanesan Ofisiál Supervizaun Eleitorál iha eleisaun sira liubá, ida ne’e hatudu iha provas, karik teste eskrita ne’e mak pasa ho valór di’ak,ami konsidera ne’e liu,”Juvito Ramos esplika.
Biban ne’e, Kandidata, Joanina Gusmao da Costa, orgullu ho prova eskrita ne’e tanba matéria iha ezame ne’e la ses hosi lei eleisaun suku nian.
“Hau mai tuir ne’e, ha’u-nia hakarak rasik maske ha’u feto ha’u mós hakarak kolabora no servisu hamutuk ba iha prosesu eleisaun suku ida ne’e,” Nia argumenta.
Hosi totál kandidatu 255 ne’e CNE munisípiu Bobonaro sei rekruta de’it na’in 193 hodi destaka bá iha suku 50 ne’ebé maka partense hosi postu administrativu neen iha munisípiu Bobonaro nian.
Notísia Relevante:CNE Bobonaro rekruta OSE 193 observa eleisaun suku
Jornalista: Sergio da Cruz
Editór: Agapito dos Santos
