BOBONARO, 31 agostu 2023 (TATOLI)-Komisaun Nasionál Eleisaun (CNE, sigla portugués) rekruta hela Ofisiál Supervizaun Eleitorál (OSE) na’in-193 hodi observa prosesu eleisaun suku ne’ebé tuir kalendariu sei realiza iha loron 27 fulan-outubru tinan 2023.
Diretór CNE Munisípiu Bobonaro, Juvito Ramos, konfirma prosesu tekrutamentu hala’o ona iha segunda loron 28 agostu ne’e.
Notísia relevante: STAE Bobonaro hahú rekruta PSAS-PSAA
“Sira sei destaka ba kada aldeia entaun ami sei rekruta ema totál ema na’in-193 bazeia ba totál aldeia,” nia informa ba Jornalista Tatoli, iha sede suku Bobonaro Vila, kinta ne’e.
Dirijente CNE Munisípiu Bobonaro ne’e dehan, daudaun ne’e prosesu tekrutamentu iha ona faze simu dokumentu hosi aplikante sira, hafoin hakat ba faze selesaun dokumentu, ezame eskrita no entrevista.
Nia reforsa, hosi testa hirak ne’e mak aplikante sira selesionadu sei hetan formasaun hosi CNE oinsa bele halo sira nia kna’ar.
“Ami-nia tekrutamentu ida ne’e la bazea ba sira-ne’ebé uluk sai ona ofisiál supervizaun, depende ba prosesu selesaun sira pasa, ami la fó oportunidade ba sira nakloke ba ema hotu, ema hotu iha oportunidade,” nia katak.
Notísia relevante: STAE Bobonaro ho autoridade sivíl-militár diskute preparasaun ba eleisaun
Jornalista: Sérgio da Cruz
Editór: Evaristo Soares Martins
