Suku foun tolu iha Baucau seidauk partisipa eleisaun suku
BAUCAU, 09 outubru 2023 (TATOLI) – Suku foun hamutuk tolu iha munisípiu Baucau seidauk bele partisipa eleisaun suku iha tinan ne’e, tanba sedauk iha preparasaun.
Sekretáriu Autoridade Administrasaun Munisipál Baucau, Simão dos Santos Marques Pinhero, esplika, razaun suku tolu refere la partisipa eleisaun tanba lideransa suku seidauk iha preparasaun relasiona ho estabelesementu suku.
“Provizoriumente eleisaun suku tinan-ne’e seidauk bele partisipa tanba tenke iha preparasaun hodi prienxe rekizitus establesementu suku,” Sekretáriu administrasaun munisipál Baucau informa ba Agência TATOLI iha Vila Nova, segunda ne’e.
Bazea alterasaun diploma ministeriál númeru 16/2017 kona-ba rekOñesementu ezisténsia suku hotu, enkuantu suku tolu ne’ebé hetan rekoñesementu bazea ba diploma ministeriál númeru 19/2023 presiza autorizasaun dadus bazea ba eleitór, geografia, mapa suku, baze dadus, kultura no infraestrutura.
Desizaun refere fó-sai hosi Governu sentrál bazea ba rezolusaun númeru 14 kona-ba regulamentu eleitór nune’e autoridade munisipál asegura hodi konsulta ba suku sira-ne’e nune’e kontinua partisipa eleisaun tuir suku tuan.
“Sira sei hola parte eleisaun tuir suku tuan ne’ebé uluk sira hola parte ba,” Simão Pinheiro akresenta.
Antes ne’e, komunidade Caibada makasa’e hato’o karta ba Governu Sentrál kona-ba prosesu eleisaun suku nune’e autoridade munisipál halo ona koordenasaun hodi hetan intendimentu atu partisipa iha kandidatu suku hodi kompleta konsellu suku tuan.
Suku foun tolu ne’ebé iha VIII Governu Konstitusionál deside establese suku foun komposta hoasi Caibada Makasa’e, Builai no Werumata foin hetan rekoñesementu iha inísiu fulan-outubru nune’e seidauk partisipa eleisaun suku tinan-ne’e.
Tuir planu IX Governu Konstitusionál liuhosi Ministériu Administrasaun Estatal (MAE) sei halo eleisaun suku foun hamutuk 10 iha territóriu nasionál hodi determina ezistensia nu’udar suku foun iha Timor-Leste.
Notísia relevante: Ofisiál supervizaun eleitorál 283 sei apoia eleisaun suku iha Baucau
Jornalista : Natalino Belo
Editór : Evaristo Soares Martins
