Ofisiál supervizaun eleitorál 283 sei apoia eleisaun suku iha Baucau
BAUCAU, 02 outubru 2023 (TATOLI) – Ofisiál supervizaun eleitorál (OSE) na’in-183 sei dezloka ba kada aldeia iha munisípiu Baucau atu apoia eleisaun suku fulan-outubru ne’e.
Diretór Komisaun Nasionál Eleitorál (CNE, sigla portugés) munisípiu Baucau, Esmeraldo Damião Belo, esplika, ofisiál hirak-ne’e konsideradu pasa bainhira hala’o selesaun liuhosi teste tuir área geografia hosi suku 59 ne’ebé tuir kontratu ho durasaun fulan-rua, hahú outubru no sei termina iha novembru.
“Sira-nia prezensa bele fasilita ona durante realizasaun eleisaun lideransa suku iha tinan-ne’e,” Diretór CNE hateten iha Vila Nova, segunda ne’e.
Tuir planu antes desloka ba terrenu, OSE sei partisipa formasaun durante loron-rua ho matéria importante ligadu ho eleisaun suku hanesan knaar no devér, imparsiál no krime eleitorál no verifika lista kandidatura.
Bainhira meza asembleia estabelese ona, knaar importante OSE nian atu akompaña verifika kritériu kada kandidatura sira hanesan sidadaun Timor-Leste, orijen hosi suku tuir kartaun eleitór, idade 17 ba leten no superviziona prosesu kampaña kada kandidatura sira tuir kalendáriu ne’ebé estabelese ona.
“Sira sei akompaña halo superviziona iha nível suku no aldeia,” Esmeraldo Belo akresenta.
Hosi tótal ofisiál supervizaun na’in-rua sei halao knar iha eskritóriu CNE Baucau no na’in-281 komposta mane na’in-115 no feto 168 sei dezloka ba kada aldeia iha postu admistrativu neen, Baguia na’in-47, Baucau Vila 65, Laga 57, Quelicai 55, Vemasse 22 no postu Venilale na’in-35.
Jornalista : Natalino Belo
Editór : Evaristo Soares Martins
