DILI, 10 outubru 2023 (TATOLI) – Xefe Unidade Nasionál HIV/SIDA iha Ministériu Saúde, Bernadino da Cruz, dehan Ministériu Saúde, hahú janeiru to’o juñu, rejista ema mate tanba HIV/SIDA hamutuk na’in-neen.
“Husi janeiru to’o juñu, ita rejista ema ne’ebé afetadu ho HIV/SIDA no lakon vida hamutuk neen, husi ne’e iha Munisípiu Dili na’in-lima no Ermera na’in ida”, Bernadino da Cruz ba TATOLI, ohin.
Nia dehan, kazu HIV/SIDA daudaun ne’e aas iha Munisípiu haat hanesan Dili, RAOEA, Bobonaro no Covalima.
“Númeru HIV/SIDA ne’e kontinua aas iha ita-nia rain, husi janeiru to’o juñu no munisípiu ne’ebé aas liu mak Dili, RAEOA, Maliana no Covalima”, nia informa.
Nia hateten, iha Munisípiu Dili kazu ne’ebé rejistradu hamutuk 143, husi ne’e Klínika Bairo Pite rejista kazu HIV-/SIDA hamutuk 17, Klínika Motael iha kazu rua, sentru saúde Becora iha kazu lima, Sentru Saúde Comoro iha 16, Key Population 27, Sentru Saúde Formoza hitu, Vera Kruz 35, HNGV 34.
“Kazu HIV/SIDA, Munisípiu Dili mak primeiru, tuir mak RAEOA rejista hamutuk 10, Covalima rejista ema na’in lima, Bononaro rua”, nia subliña.
Kazu afetadu moras HIV/SIDA iha Munisípiu Aileu na’in-rua, Ainaro ema na’in-tolu, Baucau lima, Ermera lima, Lautem ida, Liquiça lima, Manatuto rua no Viqueque ida.
Husi númeru ne’e, ema afetadu hahú hosi idade joven to’o idade avansadu, entaun sira iha hela tratamentu nia laran inklui ho inan isin rua hamutuk 15.
“Ita haree mak inan pozitivu ona signifika oan mós afeta entaun daudaun ne’e halo hela tratamentu nia laran”, nia dehan.
Ministériu Saúde iha aimoruk ne’ebé sufisiente hodi fó tratamentu ba pasiente afetadu HIV/SIDA sira iha kada munisípiu no sentru saúde iha Dili laran inklui HNGV.
Notísia relevante : Timor-Leste rejista pasiente HIV/SIDA 1.704 no mate 271
Infografia: 2003 to’o 2022, TL rejista pasiente HIV/SIDA na’in-1.582 no óbitu 278
Jornalista : Felicidade Ximenes
Editór : Zezito Silva