Governu akompaña diskusaun bankada parlamentár ba kandidatu komisáriu CAC

DILI, 10 outubru 2023 (TATOLI)—Vise Ministru ba Asuntu Parlamentár, Adérito Hugo da Costa, hateten akompaña hela diskusaun bankada parlamentár kona-ba atu hetan entendementu ba kandidatu komisáriu Komisaun Anti-Korrupsaun (CAC, siglá portugés).
Notísia Relevante: Bankada CNRT-FRETILIN iha ona entendementu ba kandidatu komisáriu CAC
Governu akompaña hela dinámika ne’ebé kontaktu bankada sira halo no semana ida-ne’e laiha plenária, tanba Parlamentu Nasionál koloka loron rua segunda no tersa hodi hala’o debate audiénsia ba lei RAEOA ho ZEESM no mós Divizaun Administrativa Territóriu.
“Semana ne’e, Governu akompaña diskusaun no loby sira-ne’ebé bankada sira iha, depois ami sei foti pozisaun,” nia hateten ba jornalista sira iha uma fukun PN.
Tanba ne’e, Governante ne’e labele pronúnsia kona-ba pozisaun Goveru atu retira kandidatu komisáriu CAC na’in-rua (2) ne’ebé antes ne’e submete mai PN hodi retira avansa de’it na’in-ida (1).
“Labele pronúnsia tanba sei akompaña dinámika diskusaun no loby (aproximasaun) sira-ne’ebé la’o,” nia hateten.
Jornalista : Nelson de Sousa
Editór : Cancio Ximenes

