Bankada CNRT-FRETILIN iha ona entendementu ba kandidatu komisáriu CAC
DILI, 10 outubru 2023 (TATOLI)—Bankada CNRT no FRETILIN iha Parlamentu Nasionál (PN) iha ona entendementu ba kandidatu komisáriu Komisaun Anti-Korrupsaun (CAC, siglá portugés) na’in-ida (1) hodi bele avansa ba eleisaun.
Notísia Relevante: Bankada parlamentár seidauk iha konsensu ba eleisaun komisáriu CAC
“Prosesu entendementu bankada rua halo hela. Ita iha ona entendementu. Ita hein de’it ona prosesu ajendamentu,” Vise bankada CNRT, Deputadu Patrocínio Fernandes, hateten ba jornalista sira iha uma fukun PN, tersa ne’e.
Daudaun ne’e, nia parte seidauk bele fó sai kona-ba kandidatu na’in-ida (2) ne’ebé bankada boot rua iha ona entendementu hodi hili, nune’e hein prosesu eleisaun mak bele hatene.
Xefe Bankada FRETILIN< Aniceto Longuinhos Guterres Lopes, hateten bankada CNRT no FRETILIN iha tiha ona entendementu ba kandidatu ida.
“Ami hetan tiha ona entendementu ba kandidatu ida, no ida seluk ne’ebé la hetan apoiu di’akliu retira, ne’e mak ami husu. Kandidatu sé, naran ne’e ha’u labele pronúnsia,” nia dehan.
Notísia Relevante: Governu propoin Sérgio Hornai no Rui dos Santos ba kargu Komisáriu CAC
Deputadu hosi bankada opozisaun ne’e hateten, parese Governu retira kandidatu rua ne’e depois avansa fali ida de’it, ida-ne’e mak bankada sira hein hela hodi bele ajenda ba eleisaun.
Enkuantu, Governu liuhosi reuniaun Konsellu Ministru (KM), foin lalais aprova proposta rezolusaun, ne’ebé aprezenta hosi Primeiru-Ministru kona-ba naran sira hanesan Sérgio de Jesus Fernandes da Costa Hornai no Rui Pereira dos Santos ne’ebé propoin ba PN ba kargu Komisáriu CAC hodi hetan aprovasaun.
Tuir lejizlasaun ne’ebé vigora, naran sira-ne’ebé propoin hosi Governu, ne’ebé analiza no vota hosi PN, no sira-nia designasaun sei presiza maiória absoluta hosi Deputadu ne’ebé marka prezensa, pelumenus 3/4 hosi Deputadu ho funsaun efetiva.
Mandatu Komisáriu CAC, Sérgio Hornai, ramata ona iha janeiru 2023.
Notísia Relevante: Komisáriu CAC Sergio Hornai nia mandatu ramata iha 21 janeiru
Jornalista : Nelson de Sousa
Editór : Cancio Ximenes
