MAE no PNDS Viqueque avalia programa no serbisu
VIQUEQUE, 10 outubru 2023 (TATOLI)—Entidade hosi Ministériu Administrasaun Estatál (MAE) hamutuk ho Programa Nasionál Dezenvolvimentu Suku (PNDS), tersa ne’e, realiza worshop hodi halo avaliasaun programa no serbisu iha munisípiu Viqueque hodi bele identifika dezafiu no progresu.
Vise-Ministru Administrasaun Estatál, Jacinto Rigoberto G. de Deus, hateten, Xefe suku no Ekipa Jestaun Suku (EJS) implementa ona programa suku iha munisípiu Viqueque durante tinan-rua ona, hahú hosi tinan 2021 to’o 2022.
“Tanba ne’e, ohin ha’u mai atu ko’alia programa PNDS hosi ministériu, ne’ebé tama iha dezenvolvimentu lokál. Programa ne’e la’ós foun ba autoridade sira, ne’ebé ninia implementasaun durante tinan-10 ona, tanba ne’e Governu hakarak halo avaliasaun hodi haree ninia progresu no dezafiu sira,” Vise-Ministru hateten durante atividade, iha salaun administrasaun, tersa ne’e.
PNDS kompostu hosi dada bee-moos, estrada rurál, sede suku no Uma Naroman ba Povu (UNP) regular, A+ no B. Governu aloka millaun $200 iha tinan 2013. Durante tinan-tolu, hahú tinan 2019 to’o 2022 orsamentu sei hela millaun $30 maka seidauk ezekuta.
“Programa ne’e iha fatin balun ha’u haree la’o di’ak maibé fatin balun la’o ladún di’ak. Tanba ne’e mak liuhosi Konsellu Ministru, Primeiru-Ministru orienta MAE tun ba munisípiu sira hodi halo avaliasaun hodi rona no haree kondisaun tanba osan labele rai de’it iha konta, tanba ita-nia sistema ne’e, bainhira tinan ramata, osan filafali ba kofre Estadu,” nia hato’o.
Notísia relevante : PNDS Viqueque menus forsa traballu kontrola programa
Governu deside kansela orsamentu ba konstrusaun uma, tanba tenke finaliza konstrusaun ne’ebé la’o daudaun.
Iha biban hanesan, Diretór PNDS Viqueque, Higino Posinato Zamor e Silva, relata, progresu implementasaun PNDS iha munisípiu Viqueque ba tinan 2021, ba programa regular faze 3 siklu 3 hosi fundu infaraestutura implementa iha postu Viqueque no Lacluta, iha suku 14, ho totál projetu 14, orsamentu $595.500, gastu $293.340 (34%), balansu $302.978,78, ho atinjimentu fíziku 78%.
Programa RKRE-2 fundu infraestutura implementa iha postu Ossu, Uatulari no Uatucarbau iha suku 22, totál projetu 24, orsamentu $ 630.772,25, gastu $288.638,36 (46%), balansu $358.854,65, atinjimentu fíziku 64%.
RSS faze 2 fundu infraestutura iha postu Viqueque vila suku 6 totál projetu 6, orsamentu $71.792,83, balansu $11.437.17, gastu 93%, atinjimentu fíziku 95%. UNP 1 fundu infraestutura munisípiu Viqueque suku 36, totál uma 108, orsamentu $1.839.699,19, gastu $1.698.419,65 (92%), balansu $141.279,54, atinjimentu fíziku 98,9%.
Implementasaun programa PNDS Viqueque 2023 PNDS regular faze 3 siklu 4 fundu infraestutura, munisípiu Viqueque, implementa iha suku 14, totál projetu 15, orsamentu $583.590, gastu $207.611,85 (36%), balansu $375.978,20, atinjimentu fíziku 47%. Bee-Moos ho fundu infraestutura, suku 21, totál projetu 21, orsamentu $777.000, gastu $253.210,35 (32%), balansu $502.916,75, atinjimentu fiziku 37%.
RSS 3 fundu infraestura munisípiu Viqueque, suku 10, totál projetu 10, orsamentu $120.000, gastu $59.386,65 (49%), balansu $60.613,35, atinjimentu fíziku 73%. UNP 2 implementa postu lima, iha suku 36, totál uma 356, orsamentu $6.064.100, gastu $2.693.056,50 (44%), balansu $3.371.047,50, atinjimentu fíziku 59%.
UNP plus A 2022 implementa postu Ossu no Uatulari totál suku 16, totál projetu 125, orsamentu $1.625.000, gastu $537.822,73 (33%), balansu $1.087.177.27, atinjimentu fíziku 30,44%. UNP 2 implementa iha suku Afaloikai, postu Uatucarbau uma tolu la implementa tanba desputa rai.
Programa regulár kada postu iha tinan 2023, postu Lacluta tau prioridade lima, Ossu 14, Uatulari 10, Uatucarbau 8 no Viqueque Vila 13.
“Atu implementasaun programa sira-ne’e la’o di’ak, ami presiza rekursu hodi kontrola, tanba daudaun forsa traballu hela na’in-25, impaktu mós udan, halo distribuisaun materiál ladi’ak, difikulta serbisu fornesidór sira. Impaktu seluk mak badaen sira, tanba iha suku programa barak, entaun badaen susar. Ida-ne’e maka sai obstákulu ba implementasaun programa,” nia hato’o.
Tanba ne’e, nia rekomenda ba Governu atu rekruta tan pesoál hodi reforsa serbisu PNDS sira-ne’ebé implementa iha munisípiu Viqueque.
Atividade avaliasaun ne’e akompaña hosi Administradór munisípiu Viqueque, Sekretáriu munisípiu, Administradór postu, Xefe suku, Diretór servisu munisipál no liña ministeriál sira.
Jornalista : Vitorino Lopes da Costa
Editora : Julia Chatarina
