MESSK fahe informasaun bá Autoridade Bobonaro kona-bá kritéria asesu UNTL-IPB

BOBONARO, 10 outubru 2023 (TATOLI) – Ministériu Ensinu Superiór Siénsia no Kultura (MESSK), tersa ne’e fahe informasaun ba autoridade munisípiu Bobonaro, kona-bá kritéria atu asesu ba ensinu superiór públiku hanesan Universidade Nasionál Timor Lorosa’e (UNTL) no Institutu Politékniku Betano (IPB) ba tinan akadémiku 2024.

Diretora Nasionál Siensia no Teknolojia hosi MESSK, Amelia de Silva Araújo, esplika, diseminasaun ne’e bazea ba dekretu lei númeru 46/2023, 5 outubru ne’ebé hanesan programa regulár diresaun jerál ensinu superiór nian realiza kada tinan.

Enkuantu objetivu hosi desiminasaun ne’e atu promove igualdade, oportunidade ekitativa ba oportunidade liuliu rejime rua hanesan rejime jerál ba Ensinu Sekundáriu Jerál (ESG, sigla portugés), Ensinu Sekundáriu Tékniku Vokasionál (ESTV) no rejime espesiál ho nia sub-rejime 16.

“Ita hotu iha-ne’e tenke ser partisipa másimu liuliu ba xefe suku sira, atubele hatene kona-bá rejime espesiál bolsa ba kbiit laek, ba ita-nia oan no mártir, veteranu sira nia-oan ne’ebé presiza assesu ba UNTL no IPB,” Nia hateten iha salaun administrasaun munisipál Bobonaro

Prezidente Autoridade Munisípiu Bobonaro, Ernesto de Oliveira Barreto, konsidera atividade ne’e importante tebes autoridade lokál no dirijente eskola sira bele iha informasaun no iha koñesimentu hodi habelar ba finalista no inan-aman sira.

Nia apela ba lideransa komunitária sira atu identifika finalista liuliu mátrtir no veteranu sira-nia oan ne’ebé merese hetan bolsa estudu.

“Informasaun la’o nafatin, tanba ita ko’alia kona-bá bolsa estudu ba veteranu no ema kbiit laek nia oan sira, ha’u husu ba xefe suku sira foti dadus ne’e tenke imparsiál, ne’e importante. Labele hare ba kor, família, entaun hau husu tenke para, tanba kbiit laek nia oan sira, nia valór boot maibé la bá,” nia fó hanoin.

Diretór Servisu Munisipál Edukasaun Munisípiu Bobonaro, Crispim Moniz, informa, totál estudante partisipa ezame nasionál tinan ne’e hamutuk 1.850.

“Sira-ne’ebé mak sei sai hanesan benifisiáriu ba asesu iha IPB no UNTL komposta hosi nível ensinu sekunadáriu tékniku vokasionál na’in-520 no ensinu sekundáriu jerál na’in-1,330,” nia katak.

Enkuantu nível eskola sekundáriu jerál hamutuk 15, komposta hosi ESG ualu no ESTV hitu.

Notísia relevante: Bolsa estudu no formasaun língua ba dosente sai prioridade ba MESSK iha 2024

Jornalista: Sérgio da Cruz

Editór: Evaristo Soares Martins