PM Xanana no delegasaun to’o ohin iha Bali
BALI, 10 outubru 2023 (TATOLI)-–Primeiru-Ministru (PM), Kay Rala Xanana Gusmão, to’o iha Aeroportu Internasionál I Gusti Ngurah Rai Bali, Indonézia, iha tuku 10:00 (Indonézia parte oeste).
Iha biban ne’e, Xefe delegasaun Ministériu Turizmu no Ekonomia Indónezia, Ni wawan Giri Adnyani, Embaixadór Timor-Leste iha Jakarta, Filomeno Aleixo, simu PM Xanana no delegasaun ho parada militár no dansa tradisionál, molok desloka bá fatin deskansa.
“Bem-vindu Primeiru-Ministru, Xanana Gusmão mai iha Bali,” Ni wawan Giri Adnyani, hato’o bainhira simu Xefe Governu, iha edifísiu VVI, Aeroportu Bali, tersa ne’e.
Notísia relevante : PM Xanana sei partisipa AIS Forum iha Bali
Hafoin ne’e, molok Xanana sa’e bá karreta, estudante hosi Eskola Sekundária Públika 02 Kuta Bali forma iha areadór aeroportu hodi komprimenta ho liman kaer bandeira Timor-Leste no bandeia Repúblika Indonézia. Primeiru-Ministru ho entuziasmu tebes hodi komprimenta estudante hirak no hasai foto hamutuk.
Hafoin ne’e, PM Xanana no delegasaun desloka kedas ba fatin deskansa Otél Samabe, lokaliza iha Nusa Dua, ne’ebé durante viajen bá otél, hetan seguransa másima hosi parte seguransa sira.
Tuir ajenda, iha kalan PM Xanana sei partisipa iha jantar amizade ne’ebé oferese hosi Autoridade Indonézia.
Primeiru-Ministru tuir ajenda sei partisipa iha reuniaun nível a’as Archipelagic and Island States Forum (AIS Forum) ka Fórum Estadu Arkipelájiku, ne’ebé sei hala’o iha Nusa Dua, Bali, iha kuarta (11/10).
Reuniaun ne’e sei realiza iha loron 10 to’o 11 outubru 2023, ne’ebé sei partisipa hosi nasaun arkipelájiku 51 no illa sira nomós organizasaun internasionál balun.
Iha tinan ida-ne’e, Indonézia sai nu’udar uma-na’in ba AIS Forum, ne’ebé iha biban ne’e, Indonézia iha esperansa bele sai inisiativa di’ak hodi bele rezolve kestaun tasi.
Forum AIS iha tinan 2023 ne’e ho tema ‘Harii kolaborasaun, ne’ebé permite inovasaun ba ita-nia oseanu no fututru’. Ajenda sorumutuk ne’e sei foka liu ba aspeitu importante tolu hanesan ekonomia azul, dezafiu kona-ba mudansa klimátika, no solidariedade entre nasaun arkipelájiku no illa kiik sira.
AIS nu’udar ponte kooperasaun entre nasaun arkipelájiku no illa kiik sira iha mundu, ne’ebé ho objetivu atu hametin kolaborasaun hodi hasoru problema globál sira, liu-liu dezenvolvimentu tasi.
Jornalista : Antónia Gusmão
Editora : Julia Chatarina
