VIQUEQUE, 30 outubru 2023 (TATOLI)— Polísia Nasionál Timor-Leste (PNTL) halo ona prosesu investigasaun ba suspeitu neen no aprezenta ona ba Ministériu Públiku (MP), ne’ebé deskonfia iha relasaun ho konfrontu iha postu Uatulari, munisípiu Viqueque.
“Ita submete ona prosesu ba MP, agora ita hein de’it bainhira maka halo notifikasaun ba suspeitu ba hatan iha Tribunál,” Komandante (PNTL) munisípiu Viqueque, Superentendente, João da Costa, informa ba Agência Tatoli, iha ninia kanar fatin, Beskem, segunda ne’e.
Notísia relevante : Konfrontu Uatulari uma hitu estragu no asegura suspeitu na’in-lima
Antes ne’e, Polísia identifika suspeitu na’in-rua, nune’e iha prosesu investigasaun identifika tan autór na’in-haat ne’ebé deskondia envolve konfrontu.
Nia dehan, PNTL sei kontinua kolabora ho MP, bainhira iha notifikasaun maka dadus balun la kompletu, maka instituisaun rua hamutuk hodi hadi’a, maibé Tribunál maka deside. Tipu kazu konfrontu ne’e ho kategoria ofensa integridade fíziku.
Konfrontu iha postu Uatulari entre suku Afaloikai no suku Macadoque, munisípiu Viqueque, iha loron sábadu (21/10) maizumenus tuku 16:00 lorokraik, nune’e PNTL Viqueque to’o iha fatin akontesementu no detein suspeitu rua hosi suku Afaloikai no Macadique.
Konfrontu ne’e rezulta ema na’in-10 no membru Polísia na’in-rua hetan kanek, inklui karreta patrullamentu Polísia no truk ida hetan tuda iha vidru.
Jornalista : Vitorino Lopes da Costa
Editora : Julia Chatarina
