VIQUEQUE, 10 outubru 2023 (TATOLI)—Responsável projetu sira hahú halo konstrusaun Uma Naroman ba Povu (UNP) lima iha aldeia Macalosa, suku Maluru, postu administrativu Viqueque Vila, munisípiu Viqueque, ne’ebé antes ne’e paradu.
“Badaen sira foin lalais hapara konstrusaun uma lima kuaze fulan-rua. Agradese agora badaen sira hahú filafali konstrusaun uma lima ne’e hodi finaliza prosesu konstrusaun,” Xefe suku Maluru, Francisco Amaral, informa ba Agência Tatoli, iha postu Viqueque Vila, tersa ne’e.
Konstrusaun uma lima ne’e kalen taka hotu ona, agora hahú reboka rai, balun halo dapur, no seluk tan.
“Ha’u espera tama dezembru ne’e badaen sira bele finaliza ona konstrusaun hodi entrega ba benefisiáriu sira. Maibé Eletricidade de Timor Leste, Empreza Públika (EDTL, E.P) seidauk instala filafali eletrisidade,” nia akresenta.
Notísia relevante : Konstrusaun UNP lima iha suku Maluru Viqueque paradu
Iha fatin ketak, Koordenadór EDTL, E.P munisípiu Viqueque, Ermesto Sarmento, hateten, ekipa téknika sira seidauk bele instala ahi tanba parte relevante sira tenke mai ko’alia ho EDTL, E.P hafoin bele instala ahi tanba sira halo ligasaun ilegál durante fulan-neen ona.
“Se parte relevante sira la mai hasoru ami, ami seidauk bele ba liga ahi, sira mós tenke kumpre tarifa lai maka ami bele liga,” nia hato’o.
Jornalista : Vitorino Lopes da Costa
Editora : Julia Chatarina
